Зүйр цэцэн үг нь тухайн үндэстний аж амьдрал, ахуй соёлын бүх хүрээг хамарсан хэлний охь дээж, олон мянган жил шигшигдэн тунгаагдсан эрдэнэсийн сан байдаг. Зүйр цэцэн үгийн талаар хэрхэн тайлбарлаж бичсэнийг Монгол утга соёл судлаач, доктор Д.Баттогтохын “Монгол үндэстний хүмүүжүүлэн сургах ухааны их нэвтэрхий толь”-оос хүргэж байна. Муугийн балаг багаддаггүй. Тиймээс “муугийн балаг олонд” гэдэг. Тогоо сүүг халбага шар сүү ээдүүлдэгтэй адил хүний сайн нэр, зөв явдлыг ганц нэг муу үйл хэрэг баллаж орхидог жишээ амьдралд бишгүй бий. Сайнаасаа илүү саар нь, сайны нөлөөнөөс муугийн уршиг нийгэмд түргэн тархдаг. Нэг муу хүний гэм бусдад хэрхэн муугаар нөлөөлдгийг монголчууд “Нэг тэмээний хорголд мянган тэмээ хальтирна”, ”Муугийн уршиг олонд могойн цус тэнгэрт”, “Нэг гүзээ шар тосыг нэг л хоргол ялзруулдаг”, “Тогоо сүүг халбага шар сүү ээдүүлнэ”, “Нэг үхрийн эвэр доргивол мянган үхрийн эвэр доргино”, “Их ч барьсан үмхий, бага ч барьсан үмхий” гэх мэтээр хэлц үгээр хэлдэг. Эх сурвалж: "Зууны мэдээ" сонин