Төв аймгийн  Цагдаагийн газрын дарга,  Цагдаагийн хурандаа А.Батбаяртай ярилцлаа.

-Төв аймгийн ИТХ-аас 2015 оныг “Амар тайван амьд­ралын төлөө нийгмийн хариуцлагыг сайжруулах”  жил болгосон. Энэ хүрээнд ямар ахиц өөрчлөлт гарга­сан бэ?

-Өнгөрсөн жилийн дээрх ажлын хүрээнд нутгийн захиргааны, төрийн болон төрийн бус байгууллага иргэдтэйгээ хамтран гэмт хэргээс урьд­чилан сэргийлэх ажилд иргэд байгууллагын орол­цоог нэмэгдүүлж, цагдаа иргэдийн хамтын ажиллагаа сайжирснаар гэмт хэргээс урьдчилан сэргийлэх ажилд ахиц гарч, аймгийн хэмжээнд 2015 онд үйлдэгдсэн гэмт хэрэг  90 нэгжээр буюу 10 хувиар буурч гэмт хэргийн илрүүлэлт 3.1 хувиар өсч 63.5 хувьтай байна. Манай аймгийн хувьд Улаанбаатар хотыг тойрон байрласан, улсын чанартай хатуу хучилттай таван зам дайран өнгөрдөг хөдөлгөөн ихтэй. Энэ утгаараа малын хулгайн гэмт хэрэг нэлээд анхаарал татсан асуудал байдаг. Мал хулгайлах гэмт хэрэгтэй тэмцэх урьдчилан сэргийлэх чиглэлээр бид 2015 оны эхнээс нэлээдгүй ажлуудыг авч хэрэгжүүлсэн. Тухайлбал аймгийн 27 сумыг найман бүс болгон тус цагдаагийн газрын тасгийн , хэсгийн дарга нараар ахлуулан тө­рөл мэргэжлийн албадын алба хаагчдаас бүрдсэн найман ажлын хэсэг гарган  2015 оны нэгдүгээр сарыг “Хулгайлах гэмт хэрэгтэй тэмцэх ажлыг эрчимжүүлэх” нэг сарын аян, мөн “Хулгайн гэмт хэргээс урьдчилан сэргийлцгээе”, “Хулгай-Сэрэмжлүүлэг”, “Илрүүлэлт”, “Отолот”, “Бүс” зэрэг нэгдсэн арга хэмжээнүүдийг аймаг орон нутгийн хэмжээнд зохион байгуулан ажилласнаар нийт гэмт хэрэг болон тодорхой төрлийн хэргүүд буурсан нь бидний ажлын үр дүн гэж дүгнэж байгаа. Тухайлбал, сүүлийн жилүүдэд тогтмол өссөн үзүүлэлэлттэй байсан. Мал хулгайлах гэмт хэрэг 26,7 хувиар буурч, илрүүлэлт 61,9 хувьтай буюу хэргийн илрүүлэлтэд ахиц гарсан. Мөн иргэдийн аюулгүй амар тайван амьдрах, гэмт хэргээс урьдчилан сэр­гийлэх чиглэлээр аймаг, орон нутгийн төр захиргааны байгууллагатай хамтран гудамж замын камер, гэрэлтүүлгийг шат дараатайгаар шийд­вэр­лүүлснээр гудамж тал­байд үйлдэгдэх гэмт хэрэг тодорхой  хувиар буурсан. Мөн архидан согтуурах явдалтай тэмцэх чиг­лэлээр тодорхой ажлуудыг хэрэгжүүлснээр согтуугаар үйл­дэг­дэх гэмт хэрэг буур­сан. Гэх мэтчилан дурдаад бай­вал ажилд ахиц, үр дүнг гарсан олон ажлууд бий. Аймаг орон нутгаас  бидний ажлыг үнэлж   аймгийн “Тэргүүний бай­гууллага хамт олон” болсонд манай хамт олон баяртай байгаа.

-Байгууллагынхаа хүрээнд онцлох ажлаас дурдана уу?

-Сумдад ажиллаж байгаа хэсгийн төлөөлөгч, цагдаа нарын ажиллаж амьд­рах нөхцлийг бүр­дүүлэх, сумын удирдлагын дэмжлэг туслалцааг авах, хамтын ажиллагааг сайжруулах зорилгоор 26 сумын Засаг дарга, хэсгийн төлөөлөгч,Цагдаагийн газрын даргын хамтарсан “Гур­валсан гэрээ”-г бай­гуу­лан ажиллаж 2015 онд гэрээгээр хүлээсэн үүргээ амжилттай сайн биелүүл­сэн, хэсгийн төлөө­лөгч нарыг ажиллаж амьдрах таатай нөхцлийг бүрдүүлэн хамтран ажилласан Аргалант , Баянчандмань, Батсүмбэр, Борнуур, Заамар, Жаргалант гэх мэт сумдын Засаг дарга нарыг урамшуулсан.

“Амар тайван амьд­ралын төлөө-Нийгмийн хариуцлагыг дээшлүүлье” урианы жилийн хүрээнд Зуунмод Сумын засаг даргын захирамжаар сумын нутаг дэвсгэрт үйл ажиллагаа явуулдаг төрийн болон төрийн бус байгууллагуудыг “Нийтийн эргүүл” арга хэмжээнд хамруулж бүтэн жилийн турш ажиллаж 60 гаруй байгууллагын 200 гаруй ажилтан алба хаагч цагдаагийн алба хаагчидтай хамтран идэвхтэй сайн ажиллсан. Энэ арга хэмжээнд идэвх санаачлагатай ажилласан байгууллага, иргэнийг аймаг, сумын Гэмт хэргээс урьдчилан сэргийлэх ажлыг зохицуулах зөвлөлөөс шагнаж урамшуулсан. Энэ ажил мөн энэ 2016 онд үргэлжлэн явагдаж байгаа. 

Цагдаагийн байгуул­лагын ажил үйлчилгээг иргэдэд хүргэх зорилгоор сар бүр хариуцсан сум, баг дээр очиж “Нээлттэй өдөрлөг”, “Хууль сур­талч­лах”  арга хэмжээг зохион байгуулж иргэдийн дунд өдөрлөг, уулзалт, урал­даан тэмцээн, сургалт, сур­талчилгаа, хяналт шал­галтыг зохион байгуулан, иргэдийн санал хүсэлтийг хүлээн авч ажилласнаар гэмт хэрэг буурч цагдаагийн ажил үйлчилгээг иргэдэд сэтгэл ханамжтай хүргэх ач холбогдолтой юм.

 -Цагдаагийн ажилтны нийгмийн баталгааг хан­гах, ажлын нөхцлийг сайж­руулахаар ямар ажил хийв?

-Цагдаагийн ажилтны нийгмийн баталгааг хан­га­хад аймаг орон нутгийн удирдлагуудтай байнгын хамтын  ажил­лагаатай байдаг.Тухайлбал, цагдаагийн алба хаагчдыг өмчлөлийн газартай бол­гох, Цагдаагийн хотхон, 25 айлын орон сууцыг ашиг­лалтад оруулж алба хаагчдыг орон сууцны хөн­гө­лөлттэй зээлд хамруулах ажлыг зохион байгуулан тус аймгийн Зуунмод суманд баригдсан 1000 айлын орон сууцанд гурван алба хаагчыг орсон. Хөдөө орон нутагт ажиллаж байгаа алба хаагчдын ажил­­лаж амьдрах нөхцлийг хангаж цагдаагийн кабоны байртай болсон, 2015 онд Баяндэлгэр, Заамар сумдад  цагдаагийн кобаны байр ашиглалтад орсон. Энэ ажилд сум орон нутгаас зохих дэмжлэг туслалцааг үзүүлж хамтран ажилладаг.  

 -Аймгийн  Цагдаагийн газрын тохижилт хэр зэрэг өөрчлөгдөж байна вэ?

-Ажлын байрны нөхцөл бололцоог сайжруулах, алба хаагчдын ажиллах ая тухтай байдлыг хангах чиглэлээр нэлээдгүй засвар үйлчилгээ, өргөтгөлийн аж­луудыг хийж ирсэн. Хамгийн сүүлд хийсэн зарим ажлуудыг дурьдвал Цагдаагийн байгууллагаар үйлчлүүлж байгаа иргэдийн ая тухыг хангахаар “Ир­гэний танхим”-ыг тохижуулан  байгуулсан.

2016 он гараад ца­даагийн газрын өргөтгөлд Эрүүгийн цагдаагийн тасгийг тусгайлан тохи­жуулсан өрөө тасалгаатай болгож, байцаалтын бо­лон таньж олуулах ажил­лагааны тусгайлсан өрөөг шинээр ашиглалтад оруулаад байна.  Мөн саатуулах байранд засвар үйлчилгээ хийж алба хаагчдын аюулгүй байдал, саатуулагдсан иргэдийн эрхийг хангах чиглэлээр шаардлагатай ажлуудыг авч хэрэгжүүлсэн. 2016 онд энэ ажлын хүрээнд аймгийн Засаг даргын тамын газар, Засаг даргад са­нал хүргүүлэн орон нутгийн төсвөөр тээврийн хэрэгсэл түр саатуулах хашаа, замын цагдаагийн иж бүрэн хяналтын пост бариулахаар хамтран ажиллаж байна.

-Хөдөө орон нутагт анхдагч болж  уулзалт-бай­цаалтын болон сэжигтнийг таньж олуулах өрөөг ашиг­лалтад оруулсаны ач холбогдол бий биз?

-Цагдаагийн байгуул­лага иргэд байгууллагад учирсан  хор хохирлыг арил­гах урьдчилан сэр­гийлэх гэмт хэрэг зөрчлийг  илрүүлэх, тас­лан зогсооход хохирогч, холбогдогч, сэжигтэнтэй уул­захад тусгайлсан уул­залт, байцаалт, таньж олуу­лах  өрөө чухал ач хол­бог­долтой . Тухайлбал: Бэлгийн хүчирхийллийн улмаас хохирсон охид, эмэг­тэйчүүдээс мэдүүлэг авах, таньж олуулах ажил­лагааны үед хувь хүний аюулгүй байдал, хүний эрхийг хангах  зорилгоор тусгай өрөөг бий болгох шаард­лагатай байсан. Канад улсын Засгийн газрын санхүүжилтээр олон улсад үйл ажиллагаа явуул­даг “Канад сангийн орон нутгийн санаач­лага хөтөлбөр”-ийн дэмж­лэгээр Цагдаагийн газрын биллярдын өрөөг “ Уулзалт байцаалтын өрөө” болгон засвар хийж, өөрчлөн тохижуулсан. Уг байрны засварын ажлыг “Туст Эр Констракшн” ХХК хугацаанаас нь өмнө чанартай хийж гүй­цэт­­гэсэнд баярлаж бай­гаагаа илэрхийлье. Уг өрөөг дуу чимээ тус­гаар­лагч, компьютер, тех­ник хэрэгсэл орчин үеийн шаардлага хан­га­сан хяналтын камер, дуу бичлэгийн төхөөрөмж, бусад техник хэрэгслүүдийг суурилуулж үйл ажиллагаандаа бү­рэн ашиглаж байна. Цаа­шид гэр бүлийн хүчир­хийлэлтэй тэмцэх, урьд­чилан сэргийлэх, хохирсон ир­гэдийг хамгаалах ажлын хүрээнд гэр бүлийн хүчирхийллийн улмаас хохирсон ир­гэдийг хамгаалах байрыг Зуунмод суманд ашиглалтанд оруулахаар төсөв хөрөнгийн асуудлыг нь Дэлхийн зөн олон улсын байгууллагаас шийд­вэр­лүүлэн ажиллаж байна.

-Алба хаагчдынхаа мэдлэг чадварыг хэрхэн дээшлүүлж байна вэ?

-Хуулийг дээдэлж, хүний эрх, эрх чөлөөг хан­гах, алба хаагчдын нийт­лэг болон тусгай чиг үүргийг хэрэгжүүлж мэдлэг ур чадварыг сайж­руулахад анхаарч ажилладаг. Жил бүр алба хаагчдыг мэргэшүүлэх болон давтан сургалтыг Цаг­даагийн ерөнхий газрын сургалт дадлагын төвөөс зохион байгуулдаг. Мөн манай байгууллага до­тооддоо цагдаагийн бай­гуул­лагын үйл ажилалгаатай холбоотой хууль тогтоомж, тэдгээртэй нийцүүлэн гаргасан эрх зүйн актуудыг тухай бүр нь алба хаагчдадаа  судлуулах, мэдлэг олгох чиглэлээр хичээл сургалтыг тогтмол зохион байгуулдаг. Мөн цагдаагийн алба хаагчдын нэг гол анхаарах зүйл бол бие бялдрын бэлтгэлжилт байдаг. Иймээс алба хаагчдаас улирал бүр бие баялдарын шалгалт авч дүгнэдэг. Мөн аймгийнхаа тус­гайл­сан чиг үүрэг бүхий байгууллагуудтай хамтран “Марш тактикийн цогцолбор” тэмцээнийг зохион байгуулж алба хаагчдынхаа бие бялдар, эрүүл мэндийг хөгжүүлэхэд анхаарч ажилладаг.

Гэмт хэрэгтэй тэмцэх нийтийн хэв жу­рам хамгаалах, олон нийтийн аюулгүй байдлыг ханга­хуулахаар  хийж хэрэг­жүүлж байгаа бидний ажилд тусалж дэмжин хамтран ажиллаж байгаа Төв аймгийн ИТХ, Засаг дарга, сум орон нутгийн удирдлага, төрийн болон төрийн бус байгууллага, ард иргэддээ цагдаагийн газрын нийт хамт олны өмнөөс баярлаж талархаж явдагаа илэрхийлье Монгол Улсын  цагдаагийн ажилтны босоо цагаан хийморь бадарч та бүхний ажлын амжилт улам батжиж байхын ерөөлийг дэвшүүлье.

Эх сурвалж: “Зууны мэдээ” сонин