Б.РЕНЧИНМЯДАГ
Өнөөдөр 43.2 мянган хүн ажил идэвхтэй хайж байна. Үүнээс 30.4 мянга нь огт ажилгүй, 12.7 мянга нь ажлынхаа хажуугаар нэмэлт орлого хүссэн хүмүүс. Харин 42.8 мянган ажлын байр зарлагдсаны 60 хувь буюу 25.6 мянгад нь энэхүү ажилгүй иргэдээс зуучилсан гэсэн судалгааг салбарын яамнаас гаргажээ. Сургууль төгссөн ч ажил олдоогүй, шилжин суурьшсан, орон тооны цомхтголд орсон гэх шалтгаанаар ажилгүй байгаа хүмүүс нийт ажилгүй иргэдийн 68 хувийг эзэлж байгаа ажээ. Тэгвэл Хөдөлмөрийн яамнаас нийслэл, хөдөөд тогтмол зохион байгуулдаг ажил хайж байгаа иргэдийг бүртгэх, ажилд зуучлах арга хэмжээгээ өчигдөр Чингисийн талбайд үргэлжлүүллээ. Энэ Хөдөлмөрийн яармагийг тус яамнаас жил бүрийн аравдугаар сарын эхний долоо хоногт тэмдэглэдэг “Дэлхийн зохистой хөдөлмөрийн өдөр”, есдүгээр сарын гурав дахь долоо хоногийн ням гаригт тохиодог “Хөдөлмөрийн салбарын ажилтны өдөр”-ийг угтан зохиож байгаа аж. “Хөдөлмөр-хөгжлийн түлхүүр” намрын хөдөлмөрийн яармаг ихээхэн ач холбогдолтой, хүн бүхэнд хэрэгтэй арга хэмжээ болсныг яармагийг зорьж ирсэн хүмүүс хэлж байна. Учир нь ажил олгогчдыг ажил хайж, сонирхож байгаа хүмүүстэй шууд уулзуулж буйгаараа онцлог. Өөрөөр хэлбэл, ажлын байрны захиалга өгсөн компаниудын төлөөлөл, хүний нөөцийн мэргэжилтнүүд хөдөлмөрийн яармагт ирж анкет бөглөсөн хүмүүсийг ярилцлагад оруулж, батламж гардуулж өгсөн юм. Тухайлбал, “Алтан фокус” хөдөлмөрийн нэгдсэн бирж 16 мянган ажлын байрны санал дээр иргэдийг бүртгэж, зуучилж байгаа бөгөөд ажил олгогчдын шаардлагад нийцсэн 40 гаруй хүнд батламжийг гардуулж өгсөн талаар тус биржийн захирал Д.Алтанцэцэг ярилаа.
Өдөрлөгт Нийслэлийн есөн дүүргийн Хөдөлмөрийн хэлтэс оролцож нээлттэй ажлын байрыг зарласан. Энэ үеэр оюутан залууст зориулсан цагийн, тогтмол ажлаас гадна тэр бүр ажлын шаардлагад нийцдэггүй 35-аас дээш насныханд зориулсан ажлын байрууд олон байсныг хүмүүс хэлж байв. Түүгээр ч зогсохгүй 2-6 сарын хугацаатай үнэ төлбөргүй сургаж үнэмлэх олгон ажилд оруулах боломжийг олгож байв.
Харин дүүргүүдийн Хөдөлмөрийн хэлтсийн мэргэжилтнүүд хөдөлмөрийн харилцаа, ажлын чиг баримжаа олгохтой холбоотой мэдээлэл зөвлөгөө өгч, жижиг дунд үйлдвэрийг дэмжих төсөл хөтөлбөрийг сонирхсон иргэн, аж ахуйн нэгжүүдэд танилцууллаа. Энэ талаар Сүхбаатар дүүргийн Хөдөлмөрийн хэлтсийн ажилд зуучлах үйлчилгээний хэлтсийн мэргэжилтэн Ц.Тунгалаг “Манай дүүрэг ажил хайж байгаа иргэдийг бүртгэж, мэдээллийн нэгдсэн системд оруулж байна. Өмнө нь ажилд орохоор бүртгүүлж байсан иргэд ажилд зуучлах хуудсаа аваад ажил олгогч дээр шууд очно. Харин бүртгүүлээгүй иргэд эхэлж анкет бөглөнө. Мөн зарим ажил олгогч ирж иргэдийг шууд ярилцлагад оруулж байгаа. Тиймээс олон хүн ажилтай болоод ажилдаа шууд очих батламжаа гардаад явж буйгаараа ихээхэн онцлогтой, өгөөжтэй өдөрлөг болж байна. Энэхүү өдөрлөгт дан ганц дүүргүүдийн Хөдөлмөрийн биржүүдээс оролцоод зогсохгүй Барилгын коллеж, Хүнс технологийн коллеж, Техник технологийн дээд сургууль зэрэг оролцлоо. Мөн дүүргийн жижиг, дунд үйлдвэрлэгчид үзэсгэлэн худалдаа гаргаж байна” гэлээ.
Хөдөлмөрийн яармагийн нээлтэд Хөдөлмөрийн сайд Г.Баярсайхан оролцсон. Тэрээр хэлэхдээ “Хөдөлмөр эрхлэлтийг дэмжих зорилгоор Хөдөлмөрийн яам ажил хайгчдыг зуучлах Хөдөлмөрийн нээлттэй өдөрлөгийг амжилттай зохион байгуулж байна. Өнөөдрийн энэ үйл явдал иргэдийг ажлын байранд зуучилсан маш чухал өдөрлөг юм. Энэ жил ажилд орсон хүмүүсийн тоо өмнөх жилийнхээс 60 гаруй хувиар өссөн нь бидний ажлын үр дүн гэж үзэж байна” гэдгийг онцоллоо.
“Дэлхийн зохистой хөдөлмөрийн өдөр” угтаж Хөдөлмөрийн яамнаас “Хөдөлмөрийн аюулгүй байдал, эрүүл ахуйн хууль тогтоомжийн шинэчлэл, хэрэгжилт” сэдэвт үндэсний хэмжээний сургалтыг бүсчилсэн байдлаар Өвөрхангай, Дархан-Уул, Сүхбаатар, Увс аймагт амжилттай зохион байгуулсан байна. Сургалтад 400 шахам хүнийг хамруулжээ. Мөн Хөдөлмөр эрхлэлтийг дэмжих хөтөлбөр, төсөлд үнэлгээ хийх, туршлага солилцох, иргэдийн санал бодлыг нээлттэй сонсох бүсчилсэн хэлэлцүүлгийг Архангай, Дундговь, Ховд, Сэлэнгэ, Хэнтий аймаг, нийслэлийн Хан-Уул, Багануур дүүрэгт, “Ажил мэргэжлийн чиг баримжааны тогтолцоог хөгжүүлэх нь” зөвлөлдөх уулзалтыг Улаанбаатар хотод зохион байгуулжээ.
Эх сурвалж: "Зууны мэдээ" сонин
