ЦАЦРАГИЙН  ХЭМЖЭЭ ЕС ДАХИН ИХ ГАРЧЭЭ

Дорноговь аймагт мал “учир битүүлгээр” үхсээр байгаа мэдээг нутгийн иргэд да­хин дуулгалаа. Энэ нь урантай холбоотой хэмээн мэдэгдэв. Харин Ерөнхий сайд Н.Алтанхуягийн тушаа­лаар тус аймагт үүссэн нөхцлийг тодруулахаар явсан шалгалтын багийн­хан мал үхсэн шалтгаан урантай холбоогүй, “Кожеговь” компанийн орчимд уран хэмжээ­нээсээ хэтрээгүй хэмээн дүгнээд байгаа юм. Тэдний дүгнэлтийг нягт­лахаар Байгаль орчны иргэний зөвлөл, “Гал үн­дэстэн” холбоо, “Голомт” цөмийн эсрэг хөдөлгөөн, “Цагаан хас” эх орончдын хөдөлгөөн зэрэг ТББ-ынхан өнгөрсөн долоо хоногт тус нутагт ажиллажээ. Тэд Засгийн газрын дүг­нэлтийг эсэргүүцэж байгаагаа хэлсэн юм.

ТББ-ууд “Кожеговь” компанийн эргэн тойрон дахь газруудад хэмжилт хийж үзэхэд цацрагийн хэмжээ хэтэрсэн байгааг тогтоосон гэлээ. Тод­руул­бал, компанийн өрөмдлөг хийсэн газар болох DL374 гэсэн тэмдэгтэй газарт цацраг зөв­шөөрөгдөх хэмжээнээс ес дахин их гарсан байна. Түүнчлэн төл мал ихээр хорогдох болсныг нутгийнхан дуулгажээ.  Орон нутагт ажилласан ТББ-ын төлөөллүүд ийнхүү ярив.

М.Баатархуяг:

ГАЖИГТАЙ ТӨЛ ОДОО Ч ТӨРЖ БАЙНА

/”Гал үндэстэн холбоо”-ы тэргүүн/

-Зөвхөн Норсүрэн гэх малчныд мал үхсэн юм биш. Бид “Кожеговь” компанийн ойр орчимд амьдардаг 10 гаруй малчин өрхийнд очлоо. Тэдэнд ч гэсэн адилхан хохирол учирсан байна. Тухайлбал, энэ хаврын мал төллөлтөөр малчин Д.Дашжамцынд хөл нь мэдээгүй ботго тө­рөөд эхийгээ хөхөж ча­дахгүй байсаар үхсэн байгаа юм. Мөн малчин Б.Бат­зоригийн үнээнээс үхсэн тугал төрсөн, нас гүйцсэн ингэний хөл нь хавдаж байгаад үхсэн. Тэд­нийд сүүлийн 25 хо­ногийн хуга­цаанд гурван бод мал ийм маягаар үхсэн байсан. П.Пүрэвцэнд хэд хо­ногийн дотор долоон мал гар­гахад гурвынх нь уушги өвчтэй, том том хүрэн толботой, элэгнийх нь тал цагаан, бөөр нь идээтэй байсныг бидэнд хэлсэн. Энэ мэтчилэнгээр малчдын төл мөл амьгүй төрж, эсвэл эд эрхтэн нь мэдээгүй төрөх, эрүүл мал ч гэнэт үхдэг болсон. Га­жигтай мал одоо ч төрж байна шүү дээ. Үхсэн малын гэдэс дотрыг үзвэл уушги нь харлаж, элэг нь цэврүүтсэн бай­далтай бай­­сан. Үхсэн малын сэгийг нохой, шувуу хөн­дөхөө больсон. Төл малын нүд өвдөж, зарим нь нүдгүй төрөх тохиолдол ч гарсан. Ураны хор хо­хирлын хамгийн тод ил­рэл нь нүдэнд нөлөөлдөг гэд­гийг мэргэжилтнүүд хэлдэг. 

Ж.Эрдэнэзаяа:

ТӨРИЙН ТЭРГҮҮНҮҮД АМЛАЛТДАА ХҮРЭХ ЁСТОЙ

/”Цагаан хас” эх орончдын хөдөлгөөний тэргүүн/

-Ерөнхий сайд өн­гөрсөн онд байгаль орчны 700 гаруй байгууллагын өмнө цөмийн эсрэг тэмцэхээ амласан. Гэтэл бодит байдалд ийм байхад Засгийн газрын тэргүүний тушаалаар ажилласан баг эсрэг дүгнэлт гаргаж байгаад итгэхгүй байна. Төрийн тэргүүн ч амлаж байсан.

Г.Ариунболд:

ЦАЦРАГИЙН ХЭМЖЭЭ ХЭТРЭЭГҮЙ ГЭСЭН НЬ ХАЧИРХАЛТАЙ

/“Голомт” цөмийн эсрэг хөдөлгөөн” ТББ-ын тэргүүн/

-Газрын хэвлийд хүх­рийн хүчил уусгах аргаар уран боловсруулах, шар нунтаг гаргах арга нь ураны ил уурхайтай харь­цуулахад хог, хаягдал бага гаргадаг ч эрсдэлгүй гэж хэлж болохгүй. Сүүлийн хоёр жил “Кожеговь” компани уран олборлох ажиллагаа явуулж ирсэн. Засгийн газраас томи­логд­сон шалгалтын багийн­х­ан мал үхсэн шалт­­гаан цацрагаас бо­лоогүй, химийн хорд­логотой байж болзошгүй гэсэн. Ялангуяа “Ко­жеговь” компа­нийн үйл ажил­лагаа явуулж байгаа тал­байд цацрагийн хэмжээ хэвийн байна гэсэн нь олны анхаарлыг татаж байна. Уг дүг­нэлтийг хүлээн зөвшөө­рөхгүй. “Кожеговь” компа­нийн орчимд хэд хэдэн газарт цацрагийн хэмжилт хийхэд зөвшөө­рөгдөх хэмжээнээс ес дахин их байгааг тог­тоолоо. Гэтэл тэр орчимд анхааруулсан тэмдэг, тэм­дэг­лэгээ байгаагүй нь компанийн хариуц­ла­гагүй үйлдэл юм. Засгийн газрын дүг­нэлтээр хэвийн хэм­жээндээ байна гэсэн нь хачирхалтай.

Ц.Энхбаяр:

 УЛААНБАДРАХЫН АРААС 102 СУМ ЖАГСЧ БАЙНА

/”Гал үндэстэн холбоо”-ы удирдах зөвлөлийн гишүүн/

-Хонгор суманд бол­сон үйл явдал Улаан­бад­рахад давтагдаж байна. Азаар тэнд хүн эндээгүй байна. Хонгор сумыг Засгийн газар зөнгөөр нь  орхи­сон шиг Улаан­бадрахыг ингэж ор­хиж болохгүй. Улаан­бадрахын араас 102 ли­цензтэй 102 сум жагсч байна. Га­даадын иргэн, компанийн баяжих хүслийн золиос монгол­чууд байж бо­лох­гүй. Бид газар нутгаа хам­гаална, цэгцэлнэ. Төрийн ордныг ч цэвэрлэнэ.