Б.УРАН, Б.ЗАЯА
Хуулиас давсан эрх мэдэлтэй “Хурд” группийн “Нарны хороолол”-ын ажлын явц 40 хувьд хүрчээ. Улаанбаатар Зүтгүүрийн Депогийн түлшний агуулахтай бөөр нийлүүлэн сүндэрлэж байгаа энэ хотхоны долоон блок барилгын карказ хэдийнэ боссон байна. Зүүн жигүүрээс нь эхлүүлээд энэ онд ашиглалтад оруулах төлөвлөгөөтэй ажиллаж байгааг ажилчид нь дуулгалаа. Нийтдээ 25 барилга босгох төлөвлөгөөтэй гэнэ. Метр квадратыг нь 1.8 саяар үнэлж, өнгөрсөн оны тавдугаар сараас захиалгаа аваад эхэлсэн. Монголын хамгийн анхны дунд сургуультай хотхон хэмээн рекламдаж байгаа тус компани айх, ичих гээч зүйлийг умартан мөнгөний төлөө улайрч байгаа ажээ. 6000 тонн түлшний агуулахаас ердөө 30 метр зайд орших барилгуудыг Депогийнхон эсэргүүцсээр ирсэн. Ажилтай нь танилцсан салбарын сайддаа хүртэл энэ талаар арга хэмжээ авахыг юуны түрүүнд дуулгаж байлаа. Харамсалтай нь Монголын хууль “Хурд” группийн өмнө хүчин мөхөстсөн юм. Энэ хаврын барилгын ажил хэдийнэ эхэлжээ. Өвлийн улиралд ч тоосго өрсөөр байсныг ойр орчмынхон нь хэлж байна. Өнгөрсөн жил эхлүүлсэн төсөл тун эрчтэй урагшилж байгаа гэнэ. Нийт 1000 орчим ажилтан ажиллаж байна. Барилгын хашаанд цахилгаан багаж хэрэгсэл, цемент зуурагч машинуудтай зэрэгцэн төмөр замын ором, ашиглахаа больсон төмөр замууд, материал хангамжийн бааз байсан хуучин агуулах зэрэг харагдана. Барилгын хойд талд хэдхэн метрийн цаана хавтан хашааны дэргэдүүр воганууд өнгөрч байна. Ажилчид нь “Барилгын дэргэдүүр зорчигч тээврийн галт тэргийг өнгөрүүлнэ гэсэн. Ачаа тээврийнхийг нь тэрүүгээр явуулах байх” хэмээн гараараа зааж зогсов.
ТҮЛШНИЙ АГУУЛАХААС 100 МЕТРТ БАЙРЛАХ ЁСТОЙ
Төмөр зам бол Монгол Улсын стратегийн онц чухал обьектийн дөрөвдүгээрт жагсдаг. Энэ чухал салбар ганц барилгын компанийн өмнө хүчин мөхөстсөн нь харамсалтай. Түлшний агуулахтай хэтэрхий ойрхон барьж байгаа барилгын асуудлыг Депогийнхон Мэргэжлийн хяналтын газарт удаа дараа мэдэгдэж, хүсэлт тавьж байжээ. Хачирхалтай нь тэд өнөөдөр өөрсдийг нь хөөсөн утгатай тайлбарыг компанийнхнаас сонсчихоод сууж байгаа. Өөрөөр хэлбэл, хотын төвд шатах аюултай бодис байлгаж байгаа төмөр замын депог нүүлгэх шаардлагатай гэж “Хурд”-ынхан заргалдсаар байгаа юм. Гэвч төмөр зам бол хэн нэгний амархан шийдчихдэг асуудал биш. Зүгээр л цаг аргацаасан үйлдэл гэдгийг хэн ч мэдэж байгаа. Газрын тосны бүтээгдэхүүний агуулахын галын аюулгүй байдлын нормын дагуу олон нийтийн барилга, байгууламжийг агуулахаас 100 метрээс доошгүй зайд барих ёстой гэсэн хуультай. Энэ хууль мэдээж зөрчигдсөн. Дээрээс нь барилга, байгууламжийн аюулгүй, найдвартай байх олон стандарт, журмыг “Хурд” групп зөрчиж байгаа юм.
“НАРНЫ ХОРООЛОЛ”-ЫН ОРШИН СУУГЧИД ХЭН БАЙХ БОЛ?
Маш их тэвчээртэй, тэсвэртэй, эрүүл мэндээ хайхардаггүй нэгэн л “Нарны хороолол”-д байр авах болов уу. Хууль, дүрмийг үл огоорон барилгаа дуусгаад зарчихлаа. Компанийнхан байраа зарчихаад л яваад өгнө. Харин тэнд орсон оршин суугчдын ирээдүй аюулгүй байх баталгааг хэн ч өгч чадахгүй. “Нарны хороолол”-д дунд сургууль, хүүхдийн цэцэрлэг, эмийн сан, банк, ресторан, фитнесс гээд үйлчилгээний бүхий л төвүүд байна гэсэн. Харин өдөр бүр зөрөлдөх галт тэрэгний чимээ, байнгын ажиллагаатай байдаг зүтгүүрийн депо гээд оршин суугчдын тав тухыг алдагдуулах нь мэдээж. Дээрээс нь байнга галт тэрэг ойрхон явах нь барилгын суурьд нөлөөлөх магадлалтайг мэргэжлийнхэн хэлдэг. “Хурд” группийн “Нарны хороолол” бол төмөр замтай ойрхон бусад барилгаас өөр. Тэр орчимд төмөр замтай холбоотой бүхий л үйл ажиллагаа өдөр, шөнөгүй өрнөдөг. Учир нь Монголын ачаа тээврийн 80-90 хувь нь энэ хэсгийг төмөр замаар дамждаг юм. Ийм л нэг хуулийг үл огоорсон орон сууцны хороолол эрчимтэйгээр ажлаа үргэлжлүүлсээр байна.
