Д.БОЛОР
Булган аймгийн Цагдаагийн хэлтсийн дэд дарга, цагдаагийн дэд хурандаа Т.Баттөмөртэй ярилцлаа.
-Булган аймгийн цагдаагийн хэлтсийнхэн өнгөрсөн онд хэрхэн ажиллав. Гэмт хэргийн үзүүлэлт буурч чадсан уу?
-Өнгөрсөн оны хийсэн ажлаа дүгнээд үзэхэд дэвшүүлсэн зорилтдоо хүрч чадсан байна. Харин гэмт хэргийн гаралт нэмэгдэх хандлагатай гарлаа. Ялангуяа, хулгай, замын хөдөлгөөний аюулгүй байдлын гэмт хэрэг өссөн үзүүлэлттэй. Үүнд хэд, хэдэн шалтгаан бий. Нэгдүгээрт, цагдаагийн хэлтсийн удирдлага ойрхон хэд, хэдэн удаа солигдсон. Хоёрдугаарт, аймагт гарах гэмт хэргийн тоо шалтгаангүйгээр өсч байна. Гуравдугаарт, манай аймгийн нутаг дэвсгэрээр улсын чанартай гурван засмал зам дайран өнгөрдөг, хүн ам ихээр төвлөрч, зам харилцаа хөгжиж буй нь шалтгаан болж байгаа бололтой. Тэр дундаа Орхон, Дархан-Уул аймгуудтай ойр байдаг учраас нөлөөлсөн гэж дүгнэж байна.
-Гэмт хэргийг бууруулахад ямар ажил санаачлан хэрэгжүүлж байна. Гэмт хэрэгтэй тэмцэхэд иргэдийн оролцоог ашигладаг аймгийн нэг байх аа?
-Аймгийн Гэмт хэргээс урьдчилсан сэргийлэх зөвлөлтэй хамтран ажиллах төлөвлөгөө гаргалаа. Ялангуяа, зам тээврийн осол, байгаль орчны эсрэг гэмт хэрэг, малын болон орон байрны хулгайн хэргийг бууруулах чиглэлээр нэлээд ажил төлөвлөсөн. Тухайлбал, улсын чанартай зам дайран өнгөрдөг Рашаант, Хутаг-Өндөр, Дашинчилэн суманд авто замын иж бүрэн пост барьж, хяналтын камер байршуулах шаардлага байна. Гэхдээ манай цагдаагийн байгууллага хэрэгтэй байна гээд гараа тосоод суух эрхгүй. Чадах хэмжээндээ санаачлагаа ажил болгож байна. Олон нийтийн эргүүл гаргах, малчдын бүлгэм байгуулах жишээтэй. Иргэд өөрсдийг нь гэмт хэргээс урьдчилан сэргийлэх ажилд дайчлах нь түүний тойрон хүрээлэгчдэд давхар сургамж болох учиртай. Цаашдаа гэмт хэргээс урьдчилан сэргийлэх ажилд иргэдийг идэвхтэй оролцуулах болно. Аймагтаа иргэдэд үйлчлэх хоёр төвийг барихаар боллоо. Газрын асуудлыг нь ИТХ-ынхан шийдэж өгнө гэсэн. Харин байр барих төсөв санхүүг нь шийдэж өгөөч гэж аймгийн удирдлагуудаас хүссэн байгаа. Хэрхэн шийдэх юм бол, бүү мэд. Гэхдээ дэмжиж ажиллана гэдэгт итгэж байна. Яагаад гэвэл аймгийн удирдлагууд маань цагдаагийн байгууллагаа дэмжин ажилладаг учраас сэтгэлдээ итгэл дүүрэн явна.
-Цагдаагийн шинэчлэл иргэдтэй харилцах харилцаанаасаа эхэлнэ гэсэн. Танай хэлтсийнхэн энэ саналыг биелүүлж байна уу?
-Шинэчлэлийн Засгийн газар, Хууль зүйн яам, Цагдаагийн ерөнхий газраас хэрэгжүүлж байгаа шинэчлэлийн бодлого, зорилтыг дэмжиж, цагдаагийн алба хаагчийн харилцааны соёл, ёс зүйн талаар манай хэлтсийнхэн анхаарч байна. Цагдаагийн хэлтсийн дарга О.Ганбат ажлаа хүлээн авснаас хойш албан хаагчдын ёс зүй, зан харилцаанд анхаарч байгааг онцлох нь зүйтэй. Тухайлбал, 106 тоот утсаар цагдаагийн байгууллагын үйлчилгээ, алба хаагчтай холбоотой санал гомдол авч байна. Цагдаагийн албанд санал гомдолтой иргэд өөрсдийн биеэр ирээд учир зүйгээ хэлэх боломжтой. Үүнээс гадна албан хаагчдынхаа дунд харилцааны соёл, ёс зүйн сургалт явуулж байна. Сургалт маань маш өгөөжтэй боллоо. Ямар үед иргэдийн санал, гомдлыг “тэвчих”, ямар үед зүй ёсны шаардлага тавих вэ зэргийг нарийвчлан ойлгуулж өгсөн гэхэд болно. Ер нь цагдаагийн алба хэцүү гэдгийг ард түмэн мэднэ. Архи уугаад гэртээ агсам согтуу тавиад байна гэсэн дуудлагаар очоод зүй ёсны шаардлага тавихаар “Буруу харилцсан. Харилцааны соёлгүй” гэж гоочлуулна. Гэхдээ зарим талаар зүй ёсны шаардлага тавьсан ч гэсэн бидний хэдэн цагдааг буруутгах тал ажиглагддаг. Тэглээ гээд манай хэлтсийнхэн гомдож тунирхдаггүй. Гүйцэтгэх ажлаа хууль ёс, дүрэм журмынх нь дагуу гүйцэтгэж байна. Цаашдаа ийм сургалт хэрэгтэй. Алба хаагч нарт сургалт ус, агаар мэт хэрэгтэй зүйл байжээ гэдэг нь анзаарагдаж байгаа. Сургалт болсноос хойш алба хаагч нарын ажлын бүтээмж сайжирч сэтгэлгээнд нь өөрчлөлт орсон байна. Ажлын үзүүлэлт, хурд нь ч сайжирч байх жишээтэй.
-Сумдад байгаа салбар нэгжийнхээ хүчин чадлыг нэмэгдүүлэх, чадавхжуулахад хэр анхаарч байна вэ?
-Сум дахь цагдаагийн хэсгийг тасаг болгох, албан хаагчдын тоог нэмэх зайлшгүй шаардлага бол бий. Тодруулбал, сум дундын дөрвөн цагдаагийн хэсгийг тасаг болгох нь чухал. Учир нь манай сумдын зай харилцаа хол учраас нэгэнд нь гарсан гэмт хэргийг мөрдөж шалгахаар бишгүй зам туулж байна. Гэхдээ гэмт хэргийг гарсны дараа биш гарахаас нь өмнө урьдчилан сэргийлэх учиртай. Энэ утгаараа орон тоо нэмэх, хэсгийг тасаг болгон өөрчлөх төсөв санхүүг нь шийдэж өгөөч гэж ЦЕГ-ын удирдлагуудаас хүссэн. Удахгүй хүсэлтийг маань авч хэлэлцнэ гэсэн мэдээ байна. Түүнээс гадна манай сумын цагдаа нарт унааны асуудал жаахан хүнд. Үүнийг маань ойлгоод Орхон, Баяннуур, Бүрэгхангай, Дашинчилэн, Бугат, Хялганат тосгоны удирдлагууд сумдын цагдаа нарыг унаагаар хангахаа амалсан. Ер нь манай аймгийн 16 сумын 10-д нь цагдаагийн кабон барьсан байна.
-Орон нутгийг камержуулах санаачилга тань биелэлээ олсон уу ?
-Цагдаагийн хэлтсийн даргын санаачлагаар Булган хотыг камержуулах асуудлыг аймгийн удирдлагууд шийдэж өгсөн. Энэ ондоо багтан аймгийн төвд 86 камерийг байршуулахаар болсон. Төсөв, мөнгийг батлаад өгсөн байгаа.
-Цагдаагийн албан хаагчдын ажиллаж амьдрах орчныг бүрдүүлэх, нийгмийн баталгааг хангахад хэр анхаарч байна?
-Ар гэр нь тайван амгалан бол албан хаагчдын ажлын бүтээмж өндөр байдаг. Амгалан тайван гэдэг маань санаа зовоох асуудалгүй байх учиртай. Энэ утгаараа албан хаагчдынхаа нийгмийн асуудлыг шийдэх, ажил мэргэжлээр нь мэргэшүүлэх чиглэлд анхаарч байна. Аймгийн Онцгой байдлын газартай хамтран 25 айлын орон сууц барихаар боллоо. Ингэхдээ хоёр талаасаа чадах хэмжээндээ төсөв цуглаад барьж байна. Одоогоор барилгын бэлтгэл ажил явагдаж байна гэх үү дээ. Түүнээс гадна хэлтсийн ажилчдын халуун ус, сауныг шинээр барьж ашиглалтад оруулсан байна.
