Ч.ЗОТОЛ
Аймгийн ШШГА шинэчлэлийн Засгийн газрын бодлогыг хэрэгжүүлэхийн зэрэгцээ ялтнуудыг хөдөлмөрөөр нийгэмшүүлэхэд анхаарч энэ чиглэлд хэд хэдэн ажил санаачлан ажиллаж байна. Энэ талаар тус газрын дарга А.Намсамандаас тодрууллаа.
-Хэнтий аймгийн ШШГА өнгөрсөн жил ажлынхаа үзүүлэлтээр улсад тэргүүлсэн. Энэ онд ямар зорилттой ажиллаж байна?
- Шинэчлэлийн Засгийн газрын бодлого, үйл ажиллагааны хүрээнд ШШГЕГ-аас дэвшүүлсэн бодлого, үйл ажиллагааг бид бүрэн хэрэгжүүлж ажиллаж байна. Энэ жилийн тухайд манай алба үүсэн байгуулагдсаны 40 жилийн ой тохиож байгаа. Мөн аймаг байгуулагдсаны 90 жилийн ой давхцаж байгаа. Ойн хүрээнд манай алба бүтээн байгуулалтын ажлууд, тухайлбал ажилтан, албан хаагчдынхаа нийгмийн асуудлыг сайжруулах, дээшлүүлэх чиглэлээр 40 айлын орон сууц барьж ашиглалтад оруулах, мөн манай албанд харъяалагддаг тоосгоны үйлдвэрийн бүтээмжийг нэмэгдүүлж чанарыг сайжруулах технологийн шинэчлэл хийж байна. Түүнээс гадна хорих ангид хоригдож буй 300 гаруй ялтныг нийгэмшүүлэх, хүмүүжүүлэх ажлыг сайжруулахад анхаарч байгаа. мэргэжилтэй ялтны тоог нэмэгдүүлэх, мэргэжилгүйд нь мэргэжил олгох сургалт зохион байгуулах, өөрсдийнх нь хүссэн мэргэжлээр чадваржуулж, чадамжийн гэрчилгээ олгох ажлыг МСҮТ-тэй хамтран зохион байгуулж ирсэн. Өнгөрсөн жил бид ялтны дунд зохион байгуулах нийгэмшүүлэх, хүмүүжүүлэх ажлыг тодорхой үр дүнтэй, шат дараатай зохион байгуулсан. Тиймээс 2012 онд нийгмийн ажлаараа нийт хорих ангиудаас шалгарч тэргүүн байр эзэлсэн. Мөн 2012 онд гүйцэтгэсэн, ШШГЕГ-ын өмнө хүлээсэн үр дүнгийн гэрээ болон төлөвлөгөөгөөр хүлээсэн үүргүүдээ бүрэн дүүрэн биелүүлж, төвлөрсөн хорих ангиудаас мөн шалгарсан. 2013 онд түрүүн дурдсан амжилтуудаа бататгах, гэрээгээр болон төлөвлөгөөгөөр хүлээсэн үүргүүдээ давуулан биелүүлэх, нийт хоригдогсод ялтнуудыг ажлын байртай болгох зорилт тавин ажиллаж байна.
-Ялтнуудыг тоосгоны үйлдвэрт ажиллуулдаг юм байна. Энэ нь улирлын чанартай ажлын байр уу?
-Манай газрын үндсэн үйл ажиллагааны нэг хэсэг нь ялтныг нийгэмшүүлэх, тэдэнд хүмүүжлийн нөлөөлөл үзүүлэх юм. Ялтныг нийгэмшүүлэхдээ хөдөлмөр эрхлүүлэхэд анхаарч байна. Хөдөлмөр эрхлэх хэлбэр ямар байна гэвэл, аймгийн хэмжээнд барилгын материалын хэрэгцээ шаардлагыг хангахуйц тоосгоны үйлдвэртэй. Энэ үйлдвэрт хорих ангид ял эдэлж байгаа нийт ялтны 40 орчим хувь нь ажлын байраар хангагдан ажиллаж байдаг. Гэхдээ энэ нь улирлын чанартай, хавар, зун, намар үйл ажиллагаа явуулдаг. Иймд улирал харгалзахгүй ажиллаж байдаг ажлын байраар хангах, хөдөлмөр эрхлүүлж цалин хөлс олгох, түүнээс нь төлбөртэй ялтны өр төлбөрийг барагдуулах ажлыг шат дараатай зохион байгуулж байгаа. Өр төлбөргүй ялтны хувьд нэрийн дансанд нь мөнгөө байршуулж суллагдаад нийгэмд гарахад нь өгдөг.
-Хоригдогч ялтнуудад мэргэжлийн сургалтыг үр дүнтэй зохион байгуулахад анхаардаг гэлээ. Үр дүн гэдгийг жаахан тодруулахгүй юу?
-Тухайн ялтны хүссэн мэргэжлээр чадваржуулах, чадамжийн гэрчилгээ олгох гэж ярьж байгаа маань түүнд чиглэсэн. МСҮТ-тэй хамтран нийгэмд эрэлттэй байгаа мэргэжлүүдээр сургаж, дадлагажуулж сертификат олгодог. Суллагдаад гарсныхаа дараа амьдралд хөл тавьж нийгэмшихэд тэр нь хэрэг болно.Тухайлбал, газар тариалан эрхлэх зэрэг барилгын чиглэлээр мэргэшүүлэх сургалтыг 2012 оноос үе шаттай хэрэгжүүлж байгаа.
40 ялтныг барилгын чиглэлээр сургалтад хамруулан мэргэжил эзэмшүүлж үнэмлэхийг нь олгуулсан. Энэ жил бетон, арматурын сургалт явуулж, шалгуур хангасан ялтнуудад мэргэжил олгох ажлыг эхлүүлээд байна. Дараа, дараагийн сургалтыг ямар чиглэлээр явуулах талаар нийт хоригдол ялтнуудаас санал авсны үндсэнд зохион байгуулах төлөвлөгөө гаргасан.
