Д.МЯГМАР
Хотын дарга Э.Бат-Үүл сард нэг удаа сэтгүүлчидтэй уулзаж тэдний сонирхсон сэдвээр яриа өрнүүлж, холбогдох албаны хүмүүс мэдээлэл өгдөг билээ. Энэ удаагийн сэдэв өргөн агуулгатай болсон ч сэтгүүлчид гэр хорооллын дахин төлөвлөлтийн талаар түлхүү сонирхож байсан. Иргэдийн саналыг 14 компани авч бүтээн байгуулалтын ажилд орохоор зэхээд байгаа билээ. Энэ талаар Нийслэлийн Засаг дарга Э.Бат-Үүл сэтгүүлчдийн асуултад хариулсныг товчлон хүргэе.
-Дахин төлөвлөлтөд хамрагдсан айлууд газраа чөлөөлөөд хаана очиж амьдрах вэ?
-Тэр асуудлыг дахин төлөвлөлт дээр ажиллаж байгаа компаниуд өөр өөрийнхөөрөө шийднэ. Тэд иргэдийн газрыг чөлөөлж авч бүтээн байгуулалт хийж байгаа тул айлуудыг тухайн компани бөөнөөр нь нүүлгэн нэг тийш нь аваачиж түр байрлуулах ёстой. Эсвэл өөрсдийн барьсан орон сууцандаа түр байлгана уу, бүтээн байгуулагчдын шийдэх ёстой асуудал.
-Гэр хорооллын дахин төлөвлөлтөд орсон хэрнээ компаниудын санал ирэхгүй байгаа газруудын асуудлыг хэрхэн шийдэх вэ?
-Ойрын хугацаанд дахин тендер зарлана. Бүр болохгүй бол хүн сонирхохгүй байгаа тэр газруудыг манай хотын захиргаанаас төлөвлөж, бүтээн байгуулалт хийх байх.
-Утааны голомт болсон Гандангийн орчмыг дахин төлөвлөлтөд хамруулаагүй юм уу?
-Тэндхийн оршин суугчид нь дургүй байна гэж би “үзмэрдсэн” юм. Тэд гудамжиндаа зам тавиулж, гэр лүүгээ дэд бүтэц, шугам хоолой оруулах сонирхолтой байсан тул дахин төлөвлөлтөд хамруулаагүй. Тиймээс тэнд элдэв компанийнхан судалгаа хийж ажиллах ёсгүйг хүмүүст анхааруулж байна. Энэ талаар иргэдээс гомдол ирэх болсон.
