Мориноос унасан хүүхдийг барьж өгдөг байсан хүү өнөөдөр 9000 гаруй хүнд үйлчилсэн бариач болжээ

ZMS.MN

40 мин

5 мин унших

-Х.Мягмардорж буюу “Бариач МС” - бага насны сонирхол, удам дамжсан уламжлалаа мэргэжлийн мэдлэг, 10 жилийн туршлагатай хослуулсан түүх-

Х.Мягмардорж буюу “Бариач МС” нь Yumeiho Therapy-ийн 2-р зэрэгтэй, 2016 оноос хойш бариа заслын чиглэлээр тасралтгүй ажиллаж буй бариач юм.

Түүний мэргэжлийн ажлын гараагаа “Ачит Мутар” эмнэлгээс эхэлж, багш Д.Мягмарсүрэн эмчээс бариа заслын арга техник, хүний биеийг ажиглах, үйлчлүүлэгчийн зовуурийг сонсох, тухайн хүний биеийн онцлогт тохируулан ажиллах зэрэг мэргэжлийн олон зүйлийг суралцжээ.

Өнөөдөр тэрээр 10 жилийн хугацаанд 9000 гаруй хүнтэй ажиллаж, Дорнод аймгийн Чойбалсан хотод “Жавхлант Бариа Заслын Төв | Yumeiho Therapy”-г ажиллуулж байна.

Түүний бариа засалтай холбогдсон түүх харин мэргэжлийн ажлаас нь нэлээд эрт эхэлжээ.

-Таны бариа засалтай холбогдсон түүх хэрхэн эхэлсэн бэ?

-Миний хувьд бариа засалтай холбоотой түүх бага наснаас эхэлсэн.

Би хүүхэд байхаасаа хүний бие барих, засах зүйлтэй ойр өссөн. Бага байхдаа морьноос унаж гэмтсэн хүүхдийн толгой, биеийг барьж өгдөг байлаа. Тухайн үед “Би ирээдүйд бариач болно” гэж бодож байгаагүй.

Харин барьж өгсөн хүн нь гайгүй болоход ах дүү, хамаатан садан маань: “Манай Мийгаа их сайхан барьдаг юм байна” гээд ам уралдан ярьдаг байсан нь одоо ч тод санагддаг.

Манай гэр бүлд ч бариа заслын уламжлал байсан. Миний эмээгийн өвгөн ах Сосор гэдэг эрдэм чадалтай хүн байсан гэж эмээ маань ярьдаг байлаа. Тэр үеийн сонирхол, гарын эв дүй, гэр бүлийн уламжлал маань хожим мэргэжлээ сонгоход тодорхой хэмжээгээр нөлөөлсөн гэж боддог.

Гэхдээ би үүнийг зөвхөн удам дамжсан мэдрэмж, гарын эв дүйгээр хязгаарлахыг хүсээгүй. Хүний биетэй ажиллаж байгаа учраас мэргэжлийн мэдлэг, зөв арга техник, дадлага туршлага зайлшгүй хэрэгтэй гэж үзсэн.

-Тэгвэл бага насны сонирхлоо хэзээнээс мэргэжил болгосон бэ?

-Би 2016 оноос бариа заслын мэргэжлээрээ тууштай ажиллаж эхэлсэн. Мэргэжлийн ажлын гараагаа “Ачит Мутар” эмнэлгээс эхэлсэн. Тэнд ажиллаж байхдаа багш Д.Мягмарсүрэн эмчээс маш их зүйл сурсан. Барианы техникээс гадна хүний биеийг ажиглах, үйлчлүүлэгчийн зовуурийг сонсох, биеийн онцлогт нь тохируулан ажиллах зэрэг мэргэжлийн олон зүйлийг багшаасаа суралцсан. Багшийн зааж өгсөн арга ухаан олон жилийн турш ажиллах тусам улам үнэ цэнтэй санагддаг.

Миний хувьд бага насанд байсан сонирхол, гарын эв дүйг мэргэжлийн мэдлэг, сургалт, практиктай хослуулан хөгжүүлэх нь хамгийн чухал байсан.

-10 жилийн хугацаанд хэчнээн хүнд бариа засал хийсэн бэ?

-Энэ хугацаанд 9000 гаруй хүнтэй ажиллаж, бариа засал хийсэн байна.

Хүн бүрийн биеийн бүтэц, хөдөлгөөн, зовуурь, амьдралын хэв маяг өөр. Тиймээс олон хүнтэй ажиллах тусам нэг хүнд тохирсон арга нөгөө хүнд яг адилхан тохирохгүй гэдгийг улам сайн ойлгож ирсэн.

Энэ 10 жилийн хугацаанд миний хуримтлуулсан хамгийн том зүйл бол практик туршлага.

-Та Японы Yumeiho Therapy чиглэлээр ажилладаг. Энэ аргын онцлог юу вэ?

-Yumeiho Therapy нь Японд хөгжсөн бариа заслын арга бөгөөд аарцаг, нуруу, биеийн байрлал, тэнцвэр болон хөдөлгөөний уялдаа холбоонд анхаардаг. Миний ажилладаг чиглэлд аарцаг, нуруу, булчин, үе мөчний хөдөлгөөн болон биеийн тэгш хэмийг харилцан уялдаатай авч үзэх нь чухал.

Аарцаг болон нурууны байрлал, булчингийн чангарал, хөдөлгөөний хязгаарлалтыг ажиглаж, тухайн хүний биеийн онцлогт тохирсон гар ажиллагааны аргаар ажилладаг.

-Аарцаг, нурууны бариагаар ямар хүмүүс ихэвчлэн үйлчлүүлдэг вэ?

-Удаан хугацаагаар суугаа ажил хийдэг, хөдөлгөөн багатай хүмүүс нуруу, ууц, хүзүү, мөр орчимд хөшилт, булчингийн чангарал мэдрэх нь элбэг.

Мөн буруу суулт, хөдөлгөөний буруу хэвшил, биеийн ачаалал, спортоор хичээллэх үеийн ачаалал болон өмнөх гэмтэлтэй холбоотой зовуурьтай хүмүүс ирдэг. Зарим хүн “нуруу өвдөөд байна” гэж ирдэг ч тухайн зовуурийг зөвхөн өвдөж байгаа хэсгээр нь харах бус, хөдөлгөөн, булчингийн ачаалал, биеийн байрлалтай нь хамтад нь авч үзэх шаардлагатай байдаг.

-Бариа засалч хүний хувьд хамгийн чухал зүйл юу вэ?

-Хүний биетэй ажиллаж байгаа учраас хамгийн түрүүнд хариуцлага байх ёстой.

Бариа засал гэдэг зөвхөн хүчээр дарах, базах, татах ажил биш. Хүний биеийн бүтэц, үе мөч, булчингийн онцлог, хөдөлгөөний зарчмыг ойлгож ажиллах шаардлагатай. Мөн ямар үед бариа хийх боломжтой, ямар үед болгоомжлох шаардлагатайг мэддэг байх хэрэгтэй.Шаардлагатай тохиолдолд эмчийн үзлэг, оношилгоо хийлгэхийг зөвлөх нь мэргэжлийн хариуцлагын нэг хэсэг.

Бүх өвчнийг бариагаар эмчилнэ гэж ойлгож болохгүй. Зарим тохиолдолд эмчийн оношилгоо, эмчилгээ нэн тэргүүнд тавигдана.

-Өнөөдөр та өөрийн төвтэй болсон. Энэ төвийнхөө талаар?

-Өнөөдөр би Дорнод аймгийн Чойбалсан хотод “Жавхлант Бариа Заслын Төв | Yumeiho Therapy” нэрийн дор хувиараа ажиллаж байна.

Миний хувьд энэ төв бол 10 жилийн турш хуримтлуулсан туршлага, багшийн зааж өгсөн эрдэм, бага наснаас эхэлсэн сонирхлоо мэргэжил болгон хөгжүүлсэн ажлын маань үргэлжлэл.

Гол чиглэл маань аарцаг, нурууны бариа засал бөгөөд хүний биеийн хөдөлгөөн, байрлал, булчин, үе мөчний уялдаа холбоонд анхаарч ажилладаг.

-Үйлчлүүлэгчдэдээ юу зөвлөх вэ?

-Нуруу, аарцаг, үе мөчний ямар нэгэн зовуурь илэрвэл удаан хугацаанд тэвчиж явахын оронд мэргэжлийн эмчид үзүүлж, шаардлагатай оношилгоогоо хийлгэх нь чухал. Мөн өдөр тутмын хөдөлгөөн маш чухал. Удаан хугацаагаар суух, буруу байрлалтай байх, хөдөлгөөний дутагдалтай байх нь биеийн булчин болон хөдөлгөөнд сөргөөр нөлөөлж болно.

Бариа заслыг зөвхөн өвдсөний дараах арга хэмжээ гэж харахаас илүүтэй биеийнхээ хөдөлгөөн, булчингийн ачааллыг зөв зохицуулах, эрүүл амьдралын хэв маягтай хослуулах нь илүү зөв гэж боддог.

Би цаашдаа ч энэ мэргэжлээрээ улам их суралцаж, олон жилийн туршлагаа хөгжүүлэн, хүмүүст зөв, хариуцлагатай байдлаар үйлчлэхийг зорьж байна.