Сайхан сэтгэл унтдаггүй
Ц.ЧИМЭДДОНДОГ
Дөрвөн ханатай бор гэрийн хоймор бяцхан хүү тоглоно. Хоёр ой өнгөрч буй хүүхэд ганганаж, шулганаж хавь ойрынхноо инээлгэж дуу шуутай байдагсан. Харин бяцхан хүү Л.Булгантамираас ямар нэг авиа гарсангүй.
“Хүү маань төрснөөс зургаан сарын дараа бид гурав Архангайн Хайрхан суманд өвөөгийнд нь очсон юм. Тэр үед шажигнадаг тоглоом наадуулах, хонь хурга майлах, нохой хуцах дуу чимээг дагаж харахгүй, анхаарлаа төвлөрүүлэхгүй байгаа нь ажиглагдсан. Тэгээд хоёр сарын дараа Улаанбаатарт ирээд шинжилгээ өгөхөд хоёр чих нь таг дүлий гэсэн онош гарсан” гэж хүүгийн ээж Э.Мөнхсувд ярив.
-Төрөлхийн сонсголгүй юм уу?
-Төрөхдөө тархи нь усан хавантай байсан. Шимэгдээд зүгээр болно гэж эмч нар тухайн үед хэлж байсан ч хаван тархийг нь аажмаар битүү бүрхээд усжсан болох нь шинжилгээгээр тодорхой болсон. Ингээд маш хүчтэй эмчилгээ хийсэн юм. Тэр эмчилгээ хүүгийн минь сонсголд нөлөөлсөн байх гэж таамагладаг.
-Өмнө нь сонсож байсан гэсэн үг үү?
-Нэг, хоёр сартай байдаа дуу чимээнээс цочиж сэрдэг, уйлдаг байсан.
-Хүүд ямар нэг эмчилгээ хийлгэсэн үү?
-Эмч, бариач, бөө, лам гээд хандаагүй хүн ховор доо. Нэмэр болоогүй. Харин “Таг дүлий хүнд сонсгол оруулах дунгийн суулгац” гэдэг мэс засал хийлгэх ганц арга байгааг мэргэжлийн байгууллагаас тодорхойлсон. Гэхдээ мэс заслыг 29500 доллараар хийдэг юм байна. Бид энэ их мөнгийг олох аргаа олохгүй байтал ЭМЖЖ эмнэлэг энэ сарын 24-нд 19500 доллараар мэс засал хийх ганцхан боломж байгааг дуулгасан. Эмч нь Хятадаас ирэх юм л даа.
-Та бүхэнд яг одоо хэдэн төгрөг байгаа вэ?
-Дөрвөн сая орчим төгрөг байгаа. Одоо л амжихгүй бол хүү маань насаараа хэлгүй дүлий болох гээд байна гэв.
Хүмүүс минь, энэ хүүд хэл хайрлаач...
Хандивын данс: ХААН банк 5021463141. Утас: 88025571
