Х.Оюунболд
БНХАУ-ын ерөнхийлөгч Ши Жиньпин, Боао 2018 Азийн эдийн засгийн чуулга уулзалтад оролцох олон улсын төлөөлөгчдийг хүлээн авч уулзав. Мөн өчигдөр НҮБ-ын ерөнхий нарийн бичгийн дарга Антонио Гутеррештэй уулзсан байна. Тэрээр энэ үеэр олон талт хамтын ажиллагааг үргэлжлүүлэх шаардлагатайг онцлоод үүний тулд дэлхийн орнуудын хамтын ажиллагаа, чухал болохыг тэмдэглэв. Тэрээр эцэст нь хэлэхдээ, “БНХАУ өөрийн загвар, онол, стратеги болон туршлагыг бусад оронтой хуваалцахыг хүсч байна” гэжээ. НҮБ-ын ерөнхий нарийн бичгийн дарга Антонио Гутерреш БНХАУ-ын Коммунист намын төв хорооны олон улсын харилцааны газрын дарга Ян Цзечи, Гадаад хэргийн сайд Ван И болон ерөнхий сайд Ли Көцян нартай уулзаж ярилцсан байна. Тэд энэ үеэр олон талт хамтын ажиллагаа, энхтайвныг хадгалахад хамтран ажиллах, аюулгүй байдал болон дэлхийн нийгэм эдийн засгийн байдлын хөгжлийн талаар хэлэлцжээ. Мөн Ши Жиньпин Австрийн ерөнхийлөгч Александ Ван дер Беллентэй уулзаж хоёр орны хамтын ажиллагааг өргөжүүлэх, стратегийн хамтын түншлэлийг бий болгох талаар ярилцсан байна.
БОАО-2018 ЧУУЛГАНЫ ДАРГААР БАН ГИ МҮНИЙГ СОНГОВ
НҮБ-ын ерөнхий нарийн бичгийн дарга асан Бан Ги Мүнийг БНХАУ-ын Боао хотод болж байгаа Азийн эдийн засгийн чуулга уулзалтын төлөөлөн удирдах зөвлөлийн даргаар өчигдөр сонгожээ. Тэрээр энэ байгууллагын удирдах зөвлөлийн дарга, Японы ерөнхий сайд асан Ясүо Фүкүдагийн орыг залгамжилж байгаа юм. Харин чуулганы дэд даргаар БНХАУ-ын ард түмний банкны захирал асан Чжоу Сяочуанийг Гадаад хэргийн орлогч сайд Ли Баодуныг ерөнхий нарийн бичгийн даргаар сонгожээ.
“НЭГ БҮС-НЭГ ЗАМ” ТӨСЛИЙГ ТАНИЛЦУУЛНА
Жил бүр зохиогддог энэ чуулган нь БНХАУ-ын Хайнан хотод энэ сарын 11-ныг дуустал үргэлжилнэ.Тэд энэ үеэр чуулганы хөтөлбөрт орсон Ази тивийг илүү нээлттэй болгох, өрсөлдөх чадвар болон шинэчлэлийн төвшинг ахиулах арга замыг хайх тухай орон нутгийн болон олон улсын тухай олон талт сэдвээр хэлэлцүүлэг өрнүүлэх юм. Чуулганд НҮБ-ын ерөнхий нарийн бичгийн дарга Антонио Гутерреш, Олон улсын валютын сангийн захирал Кристин Лагард, Австрийн ерөнхийлөгч Александр Ван дер Бэллен болон Филлипиний ерөнхийлөгч Родриго Дутерте, Монгол Улсын Ерөнхий сайд У.Хүрэлсүх нарын 2000 гаруй зочин оролцож байгаа юм. Өнөөдөр ерөнхийлөгч Ши Жиньпин чуулганы нээлтийн үгийг хэлэх бөгөөд энэ үеэр орон нутгийн болон олон улсын байдалтай холбоотой БНХАУ-ын баримталж буй байр суурийн талаар ярих ажээ. Үүнээс гадна чуулганы хөтөлбөрт орсон тив хоорондыг холбох “Нэг зам-нэг бүс” төслийн талаар танилцуулах юм байна.
Эх сурвалж: "Зууны мэдээ" сонин
