НҮБ-ын Афганистан дахь тусгай төлөөлөгч Тадамичи Ямамото тус улсад өрнөсөн дайны улмаас амь үрэгдсэн хүний тоо их байна гэж мэдэгджээ. Тэрээр “Бид мөргөлдөөнийг дуусгахын тулд найрамдлын гэрээ байгуулах хэрэгтэй. Иймээс бүгд хоёр дахин хүчээ дайчилж ажиллах шаардлагатайгаас гадна мөргөлдөөнд оролцогч талууд энгийн иргэдийг хамгаалах арга хэмжээ авах ёстой гэж уриалжээ. НҮБ-ын Афганистан дахь суурин төлөөлөгч Тадамичи Ямамото тус байгууллага өнгөрсөн жилийн мөргөлдөөний тухай жилийн тайланг танилцуулах ажиллагаан дээр энэ талаар ярьсан байна.
Энэ сарын 15-нд нийтэлсэн тайлангаас үзвэл өнгөрсөн жилийн байдлаар энэ зэвсэгт мөргөлдөөний улмаас 3440 орчим хүн нас барж, 7000 гаруй хүн шархадсан гэжээ. НҮБ-ын Афганистан дахь байгууллагын мэдээлснээр энэ үзүүлэлт нь 2016 оныхтой харьцуулбал есөн хувиар буурсан. Гэхдээ хохирогчдын ихэнх нь амиа золиослогчдын халдлага, гар аргаар хийсэн дэлбэрэх төхөөрөмжөөр зэвсэглэсэн дайралтад өртсөн гэж бүртгэгдсэн хэмээн онцолжээ. Үүнээс гадна өнгөрсөн онд энгийн иргэн амь үрэгдэх болсон гол шалтгаан нь Засгийн газрын цэргүүд болон зэвсэгт бүлэглэлийн хоорондын мөргөлдөөн юм гэсэн байна.
Эх сурвалж: "Зууны мэдээ" сонин
