Т.БАТСАЙХАН
“Алдар” спорт хорооны дасгалжуулагч Ж.Отгонбаярын хоббиг танилцуулж байна. Тэрээр Бээжингийн олимпийн аварга, Хөдөлмөрийн баатар Э.Бадар-Ууган, олимпийн мөнгөн медальт, гавьяат тамирчин П.Сэрдамба нартай эн зэрэгцэн, боксын рингэнд тулалдаж явсан нэгэн. Тэднийг нэгэн үеийн онжавууд хэмээн нэрлэнэ. 1999 оноос эхлэн боксын спортоор хичээллэж, олон улсын чанартай тэмцээнүүдэд амжилттай оролцон эх орныхоо нэрийг гаргаж явсан. Гэсэн ч 2012 онд тодорхой шалтгаанаар зодог тайлж, дасгалжуулагчийн эгнээнд шилжжээ. Ид тулалдаж, амжилтын оргилд хүрэх үедээ зодог тайлсан ч боксын рингээ “мартахгүй” гэсэндээ бээлий цуглуулдаг болсон байна. Түүнд цуглуулга нэгт, “Нарантуул”-ын босс Ш.Сайхансамбуу шиг сүлд модны чинээ боксын бээлий байхгүй ч өөрийн гэсэн нандин ертөнцийг аль хэдийнэ бий болгожээ. Одоогоор арав орчим төрлийн 40 гаруй боксын бээлий түүний цуглуулгад бий. Герман, Тажикстан, ОХУ, Куба зэрэг орны брэндийн бээлийнүүд ч хараа булааж байна. Нэгэн үеийн онжавууд болох Хөдөлмөрийн баатар Э.Бадар-Ууган найз нь түүнд гарын үсгээ зурж бээлийгээ дурсгасан нь хамгийн нандин бэлэг болжээ. Одоо Ж.Отгонбаярын цуглуулгын хойморьт Э.Бадар-Ууганы гарын үсэгтэй улаан бээлий үнэтэй байр суурь эзэлнэ. Мөн зөвхөн бээлий гэлтгүй бокстой холбоотой бэлэг дурсгалын зүйл ч түүнд нэлээдгүй байна. Хумсын чинээ боксын бээлий, тэмцээнүүдийн тэмдэг, хэрэглэлүүд ч түүний нандин цуглуулгыг чимж байлаа.
Эх сурвалж: “Зууны мэдээ” сонин
