Ө.БАТХҮҮ
Энэ бөмбөрцөгийн хаана ч 90-ээд оны үед сурагч байсан, одоо ид бүтээх насандаа яваа залуусын шүтээн нь Backstreet boys байлаа. Тэд үнэхээр од байсан учир дэлхийн хаана ч очиж тоглолт хийсэн галзуу үзэгчид нь дүүрэн байдаг ажээ. Тус хамтлагийнхан эргэн нэгдсэнээ тохиолдуулж энэ онд 20 жилийн ойн аялан тоглолтоо дэлхий даяар хийж буй юм. Нэгэнт “World tour” хэмээн нэрийдсэн учир манайд ч бас тоглох тухай зар түгж, бүр энэ сарын 23-нд “Буянт ухаа” спорт цогцолборт болно хэмээн албаны цахим хуудаст нь орсон ч худал байсан. Гэхдээ Бээжинд тоглоно гэдэг монголчуудын хувьд том боломж, очиж үзэх завшаан байлаа. Тэдний тоглолтын тасалбарын үнэ 280-1280 юанийн хооронд байв. Монгол төгрөгөөр бол 66 мянгаас 300 мянган төгрөг гэсэн үг. Судлаж байгаад 480 юанийн тасалбарыг нь захиалж чадсан учир мэргэжил нэгт хэдэн найзтайгаа хамт Бээжинд очлоо. Baскstreet boys Хятадын есөн хотод тоглох хуваарийг анх гаргасан байсан ч өнгөрсөн бүтэн сайнд товлосон Shenzhen нэртэй хотын тоглолтоо цуцалсан байна лээ. Яагаад тэгснийг сайн мэдээгүй. Харин гомдсон фэнүүдийнх нь үг цахим хуудсаар нь дүүрчээ. Гэхдээ 28-нд Шанхайд болсон, 31-нд буюу өнөөдөр Чэнгду-д, зургадугаар сарын 02-нд Фүзхоу-д, 06-нд Нанжинд, 08-нд Гуанжоу-д төлөвлөсөн тоглолтууд нь хуваарийн дагуу үргэлжилж байгаа юм. Тоглолтын тасалбарын хувьд аль хотод тоглохоосоо шалтгаалахгүйгээр бараг ижил юм байна. Өнгөрсөн бямба гаригт Бээжин бүрхэг байв. Зарим газраа манан буугаад өндөр байшингуудынх нь орой үзэгдэхгүй уйтгартай. Baскstreet boys хамтлагийнхан тоглолтоо хийхээр төлөвлөсөн “Mastercard center” буюу Wuksong Arena нь хотынхоо төвөөс баруун зүгт 20 орчим километр зайтай 18 мянган хүний суудалтай битүү цэнгэлдэх байв. Манайхыг бодвол Бээжинд зар сурталчилгааны самбар байхгүй, дэлхийн алдартай хамтлагийнхан тоглох гэж байгаа гэсэн ямар ч уур амьсгал бүрдээгүй юм шиг байх нь сонирхолтой юм. Нутгийн жолоочтой хэл амаа ололцохгүй төөрч байж цэнгэлдэхээ олтол төв хаалганаас нь нэлээд наана дугаарлаж байгаа залуусаас өөр бичиг, зураг энэ тэр алга. Цаг тулсан учир дотогш яаруу орвол зургаан төвшин бүхий суудалтай цэнгэлдэхэд залуус аль хэдийнэ байраа эзэлжээ.
Нэг их удалгүй товлосон цагаасаа 10 минутын дараа тоглолт эхэллээ. Нөгөө Aj, Brian, Howie, Kevin, Nick нар “Hello Beejin” гэж мэндчилээд л дундуур нь дураараа нэг их юм ярилгүй дуулж гарсан. Зарим нэг шинэ уран бүтээлийг нь эс тооцвол бүгд танил дуу. Backstreet back-аас эхлээд As long аs you love me, I want it that way, Show me the meaning of being lonely, Larger than life... Залуус хэл соёл, үндэстэн хамаарахгүйгээр бүгдийг нь даган дуулсаар нэг мэдэхэд тоглолт дуусав. Ердөө нэг цаг 20 минут л болсон тоглолт бидэнд бол хэтэрхий богино санагдсан. Харин тэд угаасаа л ийм цөөхөн цагаар тоглож, үзэгчид ч “Дахиулъя” гэж ядаргаа болохгүйгээр тарж оддог бололтой. Backstreet boys хамтлагийн дэлхийг тойрч буй аялан тоглолтын тухайд ерөнхийдөө ийм. Үнэтэй тасалбар авч чадаагүйгээс холоос авсан зураг тавьж, илүү тодорхой дүрслэл гаргаж чадаагүйдээ уншигчдаас хүлцэл өчье. Хэсэг үеийг төлөөлөх залуус бидний багын гэгээн дурсамжийг сэргээсэн, дэлхийд алдартай boy band-ийн тоглолт үргэлжилж байгаа. Тэд ирэх аравдугаар сард Японы 10 гаруй хотоор тоглох хуваариа гаргасныг цахим хуудсаас нь хараарай, боломж гарвал очиж үзээрэй. Сурагч насны сайхан дурсамжууд нөгөө харь орны арын гудамжны хөвгүүдийн дуу, хоолойтой холбогдон урсч байна билээ.
