Л.ХЭРЛЭН
УИХ-ын гишүүн асан Л.Гүндалай хэвлэлээр ярих хүсэлгүй болчихсон гэнэ. Түүнээс утсаар авсан ярилцлагыг хүргэж байна.
-Ингэхэд та яагаад хэвлэлд ярилцлага өгөхөө больсон юм бэ. Яагаад чимээгүй суухаар шийдэв?
-Би УИХ-ын гишүүн болоогүй юм чинь ярилцлага өгч яах юм. Сонгуульд санал авч гарсан хүмүүс нь л ярина биз.
-Яагаад тэгж үзэх болов?
-Ахад нь ярих юм алга. Тэгээд ч би ямар ажил хийж байгаа биш.
-Ямар сонин юм бэ. Та хэвлэл, мэдээллийн хэрэгслүүдийг харж байгаа биз дээ, ярих сэдэв олон байна шүү дээ. Бас асуумаар зүйлүүд ч байна?
-Би телевиз үзэж, сонин уншихаа байсан.
-Яагаад?
-Ер нь телевиз үзэж, сонин уншиж яах юм.
-Та бөх сонирхдог бас дэмждэг байх аа. Ядаж бөхийн барилдаан ч харахгүй байгаа гэж үү?
-Харах юмаа бол харалгүй яахав.
-Та АН-ын гишүүн. Нам тань олонхи болоогүй ч олон болж Засгийн газраа байгуулаад ажиллаж байна. Шинэчлэлийн бодлогуудыг хэрхэн дүгнэж байгааг тань сонирхмоор байна. Тэр үүднээс ярилцлагад урьж болох уу?
-Тэр ажлыг хийж байгаа хүмүүс нь л яриг. Түүнээс би нэг их яриад байх асуудал биш байх аа.
-Ярьж болохгүй гэж хуульчлаагүй санагдах юм. Харин танай намын дүрэмд тэгж оруулсныг би мэдээгүй юм биш байгаа?
-Дөнгөж ажлаа эхэлж байгаа Засгийн газрын тухайд одоогоор хэлэх зүйл алга.
-Цаашид хэлэх зүйл гарч ирэх байх гэж үү?
-Үнэхээр цаашид болохгүй, бүтэхгүй зүйлүүд гарч ирээд, тэр талаар дуугарахаас аргагүйд хүрвэл ярьж хэлэлгүй яахав.
-Удахгүй Ерөнхийлөгчийн сонгууль болно, тэр талаар?
-Болдог юм болдгоороо л болно биз. Надад ямар хамаатай юм бэ.
-Та өмнө нь нэрээ дэвшүүлж байсан биз дээ?
-Тэгээд яагаав, болохгүй зүйл хийсэн байна уу?
-Зүгээр л асуусан юм. Сүүлийн үед та ямар ажил амжуулж байна?
-Гэртээ хүүхдүүдтэйгээ бужигнаж суудаг болсон шүү дээ.
-Өмнө нь гэрийнхэндээ цаг, зав гаргаж амждаггүй байсан байх аа?
-Цаг гаргах үедээ гаргалгүй яах вэ.
-Ажил, албан тушаал өгөөгүй ч нам чинь томоохон зүйлээр, тухайлбал лиценз өгч таны амыг тагласан гэж дуулдаад байгаа нь үнэн үү?
-Тийм зүйл байхгүй.
-Тэгвэл та гадаадад Элчин сайдаар явах гэж байгаа юм уу?
-Бас хэн тэгж байна вэ.
-Тэгж тааж байгаа юм?
-Сэтгүүлчид намайг янз бүрийн газар луу явуулаад, ирүүлээд янз бүрээр бичдэг шүү дээ. Одоо тэгээд хааш нь явуулах гэнэ вэ.
-АН сул байгаа хүмүүсээ энд, тэндхийн элчингээр явуулж байгаа нь үнэн биз дээ. Таныг ч бас явуулах гэж байж магадгүй гээд л асуусан юм?
-Сэтгүүлчид яахаараа байнга хардаж сэрдэж, элдвийн юм ярьж, асууж явдаг байна аа.
-Хардах эрхтэй хүмүүс чинь сэтгүүлчид шүү дээ?
-Хардах эрхтэй гээд л байнга хардаад байж болохгүй биз дээ.
-Тэгээд та үнэхээр ярилцлага өгөхгүй гэж шийдчихсэн хэрэг үү?
-Би хэлээд байна шүү дээ. Одоогоор юу ярих вэ дээ гэж. Цаашид болохгүй, бүтэхгүй зүйл гараад, нийгэмд хандаж дуу хоолойгоо нэмэрлэх шаардлага гарвал аль болох олон түмнийхээ талд ярьж хэлэлгүй яахав.
