Б.ТУУЛ
Нийслэлд сүүлийн хэд хоног их хэмжээний цас ороогүй. Гэсэн ч шөнөдөө хяруу унах, хэт хүйтрэх зэргээс болж, замын хальтиргаа гулгаа ихээр үүсч байгаа. Үүнээс болж хүмүүс бэртэж, гэмтэх, хөл гараа хугалах явдал газар авсаар байна. ГССҮТ өдөрт 300 гаруй хүнд үйлчилж, ачааллаа даахгүйд хүрээд байна гэдгийг холбогдох албаныхан хэлж байгаа. Иймээс бэртэлтэй үед юуг анхаарах хэрэгтэй, ямар хоол хүнс хэрэглэх нь эдгэрэлтийг түргэсгэж, эрүүл мэндэд тустай байдаг талаар Гэмтэл согог судлалын үндэсний төвийн хүлээн авах тасгийн эмч Б.Батзоригоос асуулаа.
ХАВАНТАЙ ҮЕД ШОХОЙ ТАВЬЖ БОЛОХГҮЙ
Ясны бэртэл авсан хүмүүс эмчилгээ хийлгэхийн зэрэгцээ гам сайн барих хэрэгтэй гэдэг. Эмнэлэгт хэвтэн эмчлүүлж байгаа болон амбулатороор боолт хийлгэж буй өвчтнүүд эмчийн зөвлөгөөг дагах нь ховор байдаг. Тиймээс хальтиргаа гулгаа ихэссэн энэ үед иргэд анхаарал болгоомжтой явах, бэртэж гэмтсэн үед яаралтай эмнэлэгт хандах нь чухал. Гэмтлийн эхэнд үе мөч хавдаж, хавагнах хүндрэл гардаг. Харин хаван бүрэн гүйцэд буусны дараа шохойн бэхэлгээг хийх ёстой. Заримдаа шохой хатахдаа загатнах, үрэх зэрэг таагүй байдал үүсдэг. Гэхдээ өвчтөн шохойг хугацаанаас нь өмнө дур мэдэн богиносгох, авч болохгүй. Хаван буух үед шохой өөрөө суларч эхэлдэг. Хэрэв та гар, хөл чилж байвал сойх аргыг хэрэглээрэй. Гараа хүссэн хугацаагаараа сойж болдог. Хөлөө 20-30 см орчим өндөрт байрлуулах нь тохиромжтой.
МӨСӨН ЖИН ЦУСАН ХАНГАМЖИЙГ САЙЖРУУЛДАГ
Боолт тавиулсны дараа гар, хөлийн хуруугаа сайтар ажиглаж байх нь зүйтэй. Боолтыг буруу хийсэн үед хуруунууд хавдаж, хөхрөх, чинэрч бадарайх, цайх шинж илэрдэг. Энэ үед яаралтай эмчдээ хандах хэрэгтэй. Харин оёдол тавиулсан өдөртөө шархны орчимд хуурай, мөсөн жинг 10-15 минутын хугацаатай тавихыг эмч зөвлөж байна. Жинг тавих хугацаандаа 15-20 минутын завсарлага авч болох юм байна. Ингэснээр цусан хангамжийг алдагдалгүй болгодог аж.
ЯСНЫ БЭРТЭЛТЭЙ ҮЕД ЯМАР ХООЛ ИДЭХ ВЭ?
Ясны бэртэлтэй эмчлүүлэгчид хор багатай хоол идэх нь тохиромжтой. Мөн хонь, үхрийн мах нь алдагдсан энерги, уурагийг нөхдөг учир хэрэглэж болно. Сүү цагаан идээ, арвай будаа, шинэ хүнсний ногоо зэрэг шим тэжээлтэй хүнс хэрэглэх хэрэгтэй. Исгэлэн тараг, айраг, архи, пиво болон хийжүүлсэн ундаа уухыг хориглодог. Эдгээр бүтээгдэхүүн нь шарх сэдрээх, эдгэрэлтийн явцыг удаашруулдаг сөрөг нөлөөтэй. Буруу бэлдсэн ангийн мах ч бас хор болох нь бий. Мөчдийн тогтворгүй хугаралттай өвчтөн аль болох чөлөөтэй, чийг даадаггүй, агаар сайн нэвтэрдэг хувцас өмсөх хэрэгтэй.
