Р.ОЮУН
Эрүүл явбал мянган лан гэж эмээ, өвөө маань ярьдаг байсан. Бид өвчилсөн хойноо эмнэлгээр гүйдэг хуучин сэтгэлгээгээ халж өвдөхгүйн тулд өөрөөс шалтгаалах бүхнийг хийх цаг болжээ. Тиймээс нийгмийн хариуцлагаа ухамсарлаж “Зууны мэдээ” сонин, Монгол, Солонгосын Дорнын анагаах ухааны төвтэй хамтран ажилчдаа урьдчилан сэргийлэх үзлэгт хамруулсан юм. Монгол Улс эрүүл иргэнтэй байж хөгжинө. Сүүлийн үед нуруу, нугасны өвчтэй хүний тоо ихэсч байгаа. Тиймээс солонгос, монгол эмч нар үзлэг хийн тухайн хүнд ямар өвчин байна. Эрүүл мэнддээ юуг анхаарах, ямар арга хэмжээ авах талаар манайханд зөвлөгөө өгөв. Энэ үеэр нуруу, нугасны гажиг засах болон сэргээн засах эмч Сүн Ён Хунаас өвчлөл яагаад ихсээд байгаа талаар сонирхлоо. Тэрээр “Би Монголд ирээд удаагүй ч миний ажигласнаар монголчууд суугаа ажил их хийдэг юм байна. Үүнээс гадна дасгал хөдөлгөөн бага хийдгээс нуруу, нугасны өвчлөл ихэсчээ. Мөн хэвлэл мэдээллийн хэрэгслээр эрүүл мэндийн дасгал хөдөлгөөний тухай сурталчилгаанууд бага явдгаас нуруу, нугасны өвчлөл ихэссэн байж магадгүй. Эмэгтэйчүүдийн хувьд өндөр өсгийтэй гутал их өмсдөг юм байна. Ер нь хэт өндөр, намхан өсгийтэй гутал өмсөх хэрэггүй.
Суугаа ажил хийдэг хүмүүс хэцүү байсан ч санасан үедээ эгц суух дасгалуудыг хийх хэрэгтэй. Харин эрчүүдийн хувьд хүнд юм өргөхдөө өвдгөө нугалж байгаад өргөх ёстой. Хэрэв шууд өргөвөл нурууны дискэнд ачаалал өгдөг. Эрүүл байхад хоол боловсруулах эрхтэн, хоолны дуршил чухал. Монгол хүмүүс мах их иддэг ч түүндээ таарсан жимс, ногоо иддэггүй юм билээ. Мөн идсэн махандаа таарсан хөдөлгөөн хийж хоолоо шингээх хэрэгтэй” гэж ярилаа.
НЭГ АНГИАС ХОЁР ХҮҮХЭД ЭРҮҮЛ ГАРЧЭЭ
Судас барина, оношлоно гэдэг аугаа том мэргэжил. Гарын мэдрэмж шаарддаг ажил. Тухайн хүн үнэнээсээ өвдөж байна уу эсвэл сэтгэлээсээ өвдөж байна уу гэдгийг эмч хүн царайнаас нь хардаг. Мөн үзүүлэх гэж байгаа өвчтөний алхаанаас мэдэж болдог байна. Тус төвийнхөн саяхан ерөнхий боловсролын сургуулийн хүүхдүүдийн дунд зөвхөн шүдний үзлэг хийхэд нэг ангийн 30-40 хүүхдээс хоёр нь л эрүүл байжээ.
Монгол, Солонгосын дорнын анагаах ухааны төв нь нугас, нурууны өөрчлөлттэй, үе мөчний өвчтэй, тархи, нүүр, нүүрний мэдрэлийн үрэвсэлтэй зэрэг дотор эрхтэний үйл ажиллагааны өөрчлөлттэй хүмүүсийг эмчилдэг.
Мөн сүүлийн үеийн эхо, рентгений аппаратуудтай, ирэх сараас орчин үеийн иж бүрэн хэрэгсэл бүхий хүний мэдрэлийн эд, эсийг нөхөн сэргээх шинэ кабинетийг нээн ажиллуулах гэж байгаа ажээ. Түүнчлэн “Койка”-гийн буцалтгүй тусламжийн хүрээнд 400 мянган ам.долларын төсөл хэрэгжүүлж байна. Энэ нь Монголын ард түмэнд үзүүлж байгаа том тус хэмээн Монгол, Солонгосын дорнын анагаах ухааны төвийн захирал Ц.Батмөнх ярьж байсан. Мөн тэрээр “Манайх эхний ээлжинд олон нийтэд үйлчилдэг “Зууны мэдээ” сонины хамт олонд урьдчилан сэргийлэх анхны үзлэгийг хийлээ. Дараагийн ээлжинд бид өнчин хүүхдүүдийг асрах газарт очих бодолтой байгаа. Ялангуяа, манай солонгос эмч нар ч гэсэн ийм хүсэлт тавьдаг. Ер нь иргэдийн эрүүл мэндийн боловсролыг дээшлүүлээгүйгээс өвчлөл ихэсдэг” гэсэн юм.
