Э.ОРХОН

Хальтиргаа гулгаанаас болж гэмтэл, бэртэл авч байгаа иргэдийн тоо эрс өсч байгаатай холбогдуулан саяхан Эрүүл мэндийн сайдын зөвлөлийн хурал ГССҮТ-д болсон. Хурлаар ГССҮТ нь хэвийн хэмжээнд үйл ажиллагаагаа явуулж чадахгүй байгааг тус эмнэлгийн удирдлагууд болон эмч нар ярьж байлаа. Тиймээс гэмтлийн эмнэлгийн ачааллаас Дүүргийн нэгдсэн эмнэлгүүд үүрэх боломж бий эсэх талаар эмч нар санал солилцсон юм. Энэ үеэр Багануур дүүргийн нэгдсэн эмнэлгийн дарга Х.Болороогоос дараах зүйлийг тодрууллаа 

-Шинэ он гарсаар хальтиргаа гулгаанаас болж гэмтэл бэртэл авсан 1000 гаруй иргэн байна. Танай дүүрэгт гэмтэл бэртэл хэр гарч байна вэ?

-Багануур дүүрэг алс­лагдсан, хүн ам багатай дүүрэг хэдий ч томоохон хэмжээний осол гэмтлүүд их гарч байсан. Уур­хайн тект дамжлага дэлбэрч олон хүн гэмтэж байсан. Мөн этилийн спирт болон аммиакын хордлогод олон хүн хорд­сон зэрэг олон осол, гэмтлүүд гарч бай­сан. Одоо бол зүүн бүсийн машин зам дам­жин өнгөр­дөг учраас олныг хамар­сан машины осол нэлээд гардаг. Тийм учраас энэ ажилд ГССҮТ-тэй нэлээд хамтарч ажилладаг. Он гарсаар хальтиргаа гулгаа­наас болж бэртсэн найман хүн байна. Осол гэмтлийн шалтгааныг судлаж үзэхэд архидан согтуурсантай холбоотой байна. Архидан согтуурсантай холбоотой­гоор гэмтэл бэртэл авсан тохиолдолд тусламж үйл­чилгээний  зардал нь эрүүл мэндийн даатгалын сан­гаас санхүүжилт өгдөггүй. Тиймээс эрүүл мэндийн байгууллага санхүүгийн хувьд хохирох тал байдаг. Дүүрэг осол гэмтлээ хү­лээж авдаг, осол гэмтлийн тусламж үйлчилгээг сайж­руулна гэдэг нь зөв асуу­дал. Яагаад гэхээр ГССҮТ-д төвлөрөл үүсч байна. Монгол Улсын өнцөг булан бүрээс хүмүүс энэ эмнэлэгт ирдэг. Энэ нь иргэд, эмнэлгийн ча­нар хүртээмжид муугаар нөлөөлж байгаа юм. Тиймээс жижиг асуудлаа орон нутагтаа, хүндэрсэн тохиолдол гуравдугаар шат­ны эмнэлэгтээ шил­жүүлдэг болох хэрэг­тэй. Ингэснээр тусламж үйлчилгээний чанар сай­жи­рах, хөрөнгө мөнгө бага­сах ач холбогдолтой юм.

-Гэмтэж бэртсэн иргэ­дээ заавал ГССҮТ-рүү явуулахгүй тэнд нь эмчлэх боломж бий юу?

-Өнгөрсөн онд манай эмнэлэгт гэмтэл бэртлийн 280 гаруй тохиолдол ирсэн. Хүлээн авахын тасаг маань 900 гаруй хүнд шархны анхны тусламж үйлчил­гээг үзүүлсэн. 200 гаруй хүн хэвтэн эмчлүүл­сэн байна. Үүнээс хүнд хэлбэрийн 54 то­хиолдлыг Гэмтлийн эмнэ­лэг рүү шилжүүлсэн. Орон нутаг­таа гэмт­лийн шалт­гаантай долоон мэс заслыг хийсэн. Тий­мээс манай эмнэлэг анхан шатны гэмтлийн туслам­жийг байнга үзүүл­дэг. Зарим тохиолдолд гурав­дугаар шатны тус­ламжийг хүртэл үзүүлдэг. Энэ асуудлыг улам бо­ловс­­ронгуй болгох үүднээс тоног төхөөрөм­жөөр хан­гаад өгвөл гэмт­лийн эмнэлгийн ачаанаас үүрэх бүрэн боломж бий. Зайлш­гүй тохиолдолд Гэмтлийн эмнэлэгт шилжүүлж бай­гаа гэмт­лүүд нь тархи бо­лон мөчний гэмтэл байдаг.

-Гэмтлийн анхан болон гуравдугаар шатлалын эмчилгээ үйлчилгээ үзүү­лэхэд эмч мэргэжилт­нүүдийн хүрэлцээ, ур чад­варын хувьд ямар байна?

-Манай эмнэлэгт нарийн мэргэжлийн мэс заслын дөрвөн эмч ажил­лаж байгаа. Нэг эмч нь мэдрэлийн чиглэлээр мэр­­­гэшсэн байна. Дад­лага туршлагатай, мэр­гэшсэн эмч нарын баг ажиллаж байгаа. Тий­мээс энэ төрлийн тус­ламж үйлчилгээг үзүүлэх бүрэн боломжтой.