Б.ДОЛЖИНЖАВ
COVID-19 халдвар цар тахлын хэмжээнд хүрсэн учир Бээжин хотод болдог Хятадын үндэсний хууль тогтоох байгууллагын жил бүрийн ээлжит хурал анх удаа хойшилсныг 2020 оны гуравдугаар сард БНХАУ-ын Ерөнхийлөгч Ши Жиньпин зарласан. Хилээс хааснаас эдийн засаг доройтож, хүндхэн хямралыг давж гарч ирсэн Ши Жиньпин болон Коммунист намынхны томоохон арга хэмжээ өнөөдөр эхэлж байна. Хятад улс 2028 он гэхэд АНУ-ыг ялж, дэлхийн хамгийн том эдийн засагтай орон болох зорилго тавьсан юм. Гэвч үүндээ таван жилийн өмнө хүрэх шинэ тооцооллыг гаргажээ.
“Ши Жиньпин цар тахлыг амжилттай ялж, хямралаас хурдан гарсан нь цар тахал ч түүнд нөлөөлж чадахгүй гэдгийг илтгэлээ” хэмээн “SOAS China Institute”-ийн захирал Стевен Цанг ярилаа. Коммунист намын 100 жилийн ой долдугаар сард болно.Энэ ойн үеэр Ши Жиньпин БНХАУ-ыг үндэслэгч Мао Зэдуны байр сууринд өөрийгөө тавихыг оролдож байна гэж ажиглагчид үзэж байна.
Ши-гийн намын ерөнхий нарийн бичгийн даргын бүрэн эрхийн 10 жилийн хугацаа 2022 оны арваннэгдүгээр сард дуусна. Түүний дараа энэ албан тушаалыг хаших боломжит хүн бол “SOAS China Institute”-ийн захирал Стевен Цанг юм. Тэрээр “Ши Жиньпинийг хэн орлох нь тодорхой. Бид сайн мэднэ” гэсэн юм.
Жил бүрийн гуравдугаар сард болдог энэ жилийн төлөөлөгчдийн хурлаар Хятадын Засгийн газрын 2035 он хүртэлх тэргүүлэх чиглэл, алсын хараа, 14 дүгээр таван жилийн төлөвлөгөөг боловсруулж, эдийн засгаа хэрхэн сэргээх, уур амьсгалын өөрчлөлт, технологийн шинэчлэл гэсэн чухал асуудлыг ярих юм.
“Энэ урт хугацааны төлөвлөгөө нь Ши Жиньпиний улсаа удирдах хугацааг харуулж байна” гэж Хятадын улс төр судлаач Билл Бишоп бичжээ. Хятадад ядуурлыг бууруулна гэж 2015 онд хэлсэн амлалтандаа Ши Жиньпин хүрснийг өнгөрсөн арваннэгдүгээр сард Коммунист нам зарласан. Энэ тухай хоёрдугаар сарын 25-ны нээлтийн ёслолын үеэр Ши ядуурлыг шийдэх нь миний алсын харааны хамгийн чухал асуудал байсан гэдгийг тодотгов.
Сүүлийн хэдэн сард Хятадын төв хэвлэлүүд ядуурлыг бууруулсан Ши-гийн бодлогыг өргөн хүрээнд сурталчилж байна. Тухайлбал, Коммунист намын “People's Daily” сонинд “Ерөнхий нарийн бичгийн дарга Ши Жиньпинийн нүд үргэлж хүмүүст анхаарлаа хандуулдаг” гэсэн гарчигтай бүтэн нүүр нийтлэл хоёрдугаар сарын 23-нд гарчээ. Үүнд түүнийг ер бусын зоригтой Марксист улс төрч хэмээн онцолжээ. “Хэвлэл мэдээллийн энэ сурталчилгаа нь түүхэн дэх Ши-гийн байр суурийг өргөж байна. Сүүлийн 70 жилийн намын түүхийг Маогийн үе, Дэн Сяопиний үе, Ши-гийн үе гэж гурав хуваана” гэж Бишоп ярив.
Эх сурвалж: CNN
