Э.Бат-Эрдэнэ: Улсын хэмжээний эрчим хүчний эх үүсвэр барина

0
хуваалцах
300
үзсэн

Ц.МЯГМАРБАЯР

Бизнес, хөгжил” булангийн энэ удаагийн зочноор Өмнөговь аймагт үйл ажиллагаа явуулдаг “Шүтээн Эрдэнэ” компанийн ерөнхий захирал Э.Бат-Эрдэнийг урьж ярилцлаа.

 

-Танай компани хэдэн онд байгуулагдсан. Үйл ажиллагааны хэдэн чиглэлд ажиллаж хэчнээн хүнийг ажлын байраар хангаж байна вэ?

-“Шүтээн Эрдэнэ” ХХК нь 2006 онд байгуулагдсан. Реклам зар сурталчилгааны чиглэлээр түрээсийн самбарын үйл ажиллагаа, гадаад дотоод худалдаа, авто тээвэр, “Perfect press print” хэвлэлийн үйлдвэр, өөрийн “Бишрэлт” худалдааны төвд сүүлийн үеийн дэвшилтэт технологид суурилсан дулааны шугам сүлжээний брэндийн тоног төхөөрөмжийн дэлгүүр болон түрээсийн үйлчилгээ үзүүлэх зэргээр үйл ажиллагаагаа өргөжүүлэн ажиллаж байна.  Мөн эрчим хүч, барилгын чиглэлээр ажилладаг. Манай компани чадварлаг, мэргэжил боловсролтой үндсэн 27 ажилтантай. 2014 оноос хойш аймаг орон нутгийн дэд бүтэц, инженерийн шугам сүлжээний чиглэлээр 10 гаруй ажил, таван сумын уурын зуухыг хагас автомат уурын зуухаар 100 хувийн шинэчлэл хийсэн. Хийсэн ажил бүрдээ шинэ технологи нэвтрүүлж, чанарын өндөр түвшинд гүйцэтгэхийг эрхэмлэдэг. Манайх жилдээ 100 орчим  сая  төгрөгийг улс, аймаг орон нутгийнхаа татварт  төвлөрүүлдэг.

- Танай компанийн нэвтрүүлж буй техник технологи, шийдэл. байгаль орчин болон эдийн засгийн хэмнэлт, үр өгөөжийн тал дээр ямар дэвшил гарган ажиллаж байна.  Хэрэгжүүлсэн томоохон төслүүдээ дурдаад хэр зэрэг хүрээг хамарч байна вэ?

- 2014 онд Даланзадгад сумын шинэ суурьшлын бүсэд бүрэн автомат дулаан дамжуулах төвийг анх хийж гүйцэтгэсэн. Мөн онд шинэ суурьшлын бүсэд гурван км дулааны тараагуур таван хос шугам ын ажлыг гүйцэтгэсэн. 2016 онд мөн Даланзадгад сумын гэр хорооллын агаарын бохирдлыг бууруулах зорилгоор бүрэн автомат дулаан дамжуулах төв, дулааны шугам сүлжээг гэр хороололд нэвтрүүлсэн. Түүнчлэн 2017 оноос 2021 он хүртэлх хугацаанд Өмнөговь аймгийн Гурвантэс, Баян-Овоо, Цогтцэций, Ноён сумдын болон Ханбогд сумын нутагт байрлах “Тайван зогсоол цогцолбор”-ын Уурын зуухны барилгыг барьж, ОХУ-н Барнаул хотоос 2кВт-н 2хос буюу нийт 4кВт-н хүчин чадал бүхий хагас автомат уурын зуухыг нэвтрүүлэн эдгээр сумдын иргэд, аж ахуйн нэгжийг эрчим хүчний найдвартай эх үүсвэртэй болгож дулаан өвөлжих нөхцлийг бий болгосон. Уг уурын зуух нь  хүний ажиллах орчинг сайжруулж, хүний оролцоог багасгасан найдвартай дэвшилтэт технологитой. Ашигт үйлийн коэффицент өндөр, автомат тоноглолтой зуух нь цахилгаан, тог, ус, түлшний зарцуулалт гэх мэт эдийн засгийн хэмнэлттэйгээс гадна  ил ажиллагаатай уламжлалт уурын зуухнуудаас эрс ялгаатай. Байгаль экологийн хувьд шатаах зуух нь түлшийг бүрэн шатаадаг, циклон үнс баригчаар яндангаас гарах утааны нарийн ширхэглэг тоосонцор, үнсийг 85-95 хувиар гадагшлуулахгүй барьдаг технологитой. Энэ технологиор аймгийнхаа сумдын уурын зуухыг бүрэн шинэчилж дуусах төлөвлөгөөтэй байгаа. Мөн бусад аймгуудын уламжлалт уурын зуухыг халах автомат уурын зуухыг нэвтрүүлэхэд хамтарч ажиллах боломжтой. Мөн Ханхонгор, Цогтцэций, Ханбогд, Даланзадгад сумдын дулаан, цэвэр, бохир усны шугамын шинэчлэлтийн ажлуудыг гүйцэтгэсэн.

-Цаашид цаг үеийн нөхцөл байдал коронавирусын дараах үетэй  уялдуулан  бизнесээ хэрхэн амжилттай удирдах төлөвлөгөөтэй байна вэ?

- Цаг үеийн байдал хэцүү байгаа ч  одоо гүйцэтгэж буй төсөлт ажлуудыг аль болох цаг хугацааны хувьд алдагдал багатай хийж гүйцэтгэхийг зорьж байна.  Мөн ажилчдынхаа эрүүл мэндэд анхаарч аль болох ажлын байрыг нь хэвээр  хамгаалахын төлөө ажиллаж байна. Манай компани нийгмийн хариуцлагын хүрээнд орон нутагтаа тусламж, дэмжлэг болгож мөнгөн хандив болон эд материалын туслалцаа үзүүлсэн. Улаанбаатар хотын зарим аж ахуйн нэгжүүд хүнд байдалд орж байгааг сонсоод харамсаж байдаг. Нэгэнт босгосон компанийг дахин хөл дээр нь босгоход эхний хөрөнгө оруулалтаасаа хэд дахин хөрөнгө оруулалт шаарддаг. Гэхдээ төр засгаас тодорхой дэмжлэг үзүүлэх байх гэж найдаж байна. Хөдөө орон нутгийн компанийнхан  бид аль болох  ажлын байрыг нь хамгаалахын тулд бусад салбарт бизнесээ хөрвүүлж ажиллахыг хичээж байна. Ер нь цар тахлаас хамаарч ажил зогсоход хүрвэл бусад салбарын бизнест анхаарлаа хандуулж ажилчдынхаа нийгмийн асуудлыг цаг хугацаанд нь шийдэх төлөвлөгөөтэй байна.

-Танай компанийн алсын хараа, үнэ цэнэ, цаашдын зорилго юу вэ?

- Манай компани эрчим хүчний салбарт Өмнөговь болон улсынхаа хэмжээнд байр сууриа эзэлсэн, чанартай дэвшилтэт шинэлэг технологийг нэвтрүүлэгч компани байх. Хүн ба хүнд суурилсан технологийн хөгжил бол манай компанийн үнэт зүйл юм. Улсын хэмжээний эрчим хүчний эх үүсвэр барих хэтийн зорилготой.

Эх сурвалж: "Зууны мэдээ" сонин 2021.2.2 МЯГМАР № 23 (6500)

Mongol
САЙХАН ХУРДТАЙ ЗАЛУУС БАЙНА,АМЖИЛТ ХҮСЬЕ.