Б.ДОЛЖИНЖАВ

Асар хурдацтайгаар тархаж байгаа цар тахлыг зогсоох цорын ганц арга нь вакцин хэмээн үзэж байсан. Тиймээс анагаах ухааны салбар нь сайн хөгжсөн хэд хэдэн орон вакциныг хурдан хугацаанд үйлдвэрлэж, хэдийнэ иргэдээ хамруулж эхэлсэн. Түүнчлэн ДЭМБ-аас “Pfizer” вакциныг баталгаажуулж, аль ч орон хэрэглэх боломжийг бүрдүүлээд байгаа билээ.

Гэвч хөл хорио тогтоож, иргэдээ гэрээс гарахыг хориглоод ч Европын орнууд халдварыг хумьж чадсангүй. Тиймээс тэд бүх итгэл найдвараа вакцинд даатган аюулгүй гэдэг нь баталгаажсан вакцинуудыг улс орнуудаас хэдэн саяар нь урьдчилан захиалж байна. Тэгвэл саяхан COVID-19 эсрэг вакцинтай боллоо хэмээн дэлхий нийтээр сүр дуулиантай зарлаж байсан бол вакцины тэгш бус байдал нь ёс зүйн асар том асуудал дагуулж байгааг ДЭМБ өчигдөр зарлалаа.

“Шулуухан хэлэхэд бид ёс суртахууны сүйрлийн ирмэг дээр ирлээ”

ДЭМБ-ын Ерөнхий захирал Тедрос Адханом Гебрейесус даваа гаригийн хэвлэлийн бага хурлын үеэр “Өнөөдрийн байдлаар баян 49 орны иргэд 39 сая тун вакцинд хамрагдсан бол нэг ядуу оронд ердөө 25 тун вакцин ногдож байна. Ядуу үндэстнүүдийн эмзэг бүлгийн хүмүүсээс өмнө баян орнуудын эрүүл, залуу хүмүүс вакцинд хамрагдаж байгаа нь шударга бус зүйл. Шулуухан хэлэхэд бид ёс суртахууны сүйрлийн ирмэг дээр ирлээ.  Үүнийг ядуу орны иргэд амь насаараа төлнө. “Би хамгийн түрүүнд” гэсэн баян орнуудын хувиа хичээсэн хандлага вакцины үнийг нэмэгдүүлэх болно. Энэ нь нийгэм, эдийн засгийн асуудал, хөл хорио болон цар тахлын үргэлжлэх хугацааг уртасгаж болзошгүй юм. Тиймээс Дэлхийн эрүүл мэндийн өдөр буюу дөрөвдүгээр сарын 7 гэхэд гишүүн бүх орон вакцинаа хүлээн авчихсан, дэлхийн эрүүл мэндийн асуудлын үндэс болсон тэгш бус байдал болон цар тахлыг хоёуланг нь ялснаа тэмдэглэнэ гэсэн итгэл дүүрэн байна” гэж ярилаа.

Вакциныг улс орнуудад хуваалцах “Covax” хөтөлбөр энэ сараас хэрэгжиж эхлэх юм. Энэ хөтөлбөрт 180 гаруй орон нэгджээ. Үүний 92 нь бага болон дундаж орлоготой буюу вакциныг тусламжаар авах шаардлагатай. Бага орлоготой 70 орны 10 хүн тутмын нэг нь вакцинд хамрагдах боломжтой юм. Өнөөдрийн байдлаар таван үйлдвэрийн хоёр тэрбум вакциныг баталгаажуулснаас хоёрдугаар сард нэг тэрбум тун вакциныг улс орнуудад түгээж эхлэхээр төлөвлөжээ. ДЭМБ-ын хүлээн зөвшөөрсөн Америк Германы хамтран бүтээсэн “Pfizer” вакцинаас гадна Хятад,Энэтхэг, Орос, Их Британи, АНУ өөрсдийн оронд үйлдвэрлэсэн вакциндаа иргэдээ хамруулж эхлээд байна.

Эх сурвалж:BBC